Baş nazir Maliyyə Sabitliyi Şurasının üzvlərini toplayıb
Tarix: 27-10-2017 10:10 | Bölmə: İqtisadiyyat
Baş nazir Maliyyə Sabitliyi Şurasının üzvlərini toplayıb

Azərbaycanın baş naziri, Maliyyə Sabitliyi Şurasının sədri Artur Rasi-zadənin rəhbərliyi ilə Maliyyə Sabitliyi Şurasının iclası keçirilib. İclas cari ilin 9 ayının yekunlarına həsr edilib.

İclasda Maliyyə Sabitliyi Şurasının üzvləri - Azərbaycan Prezidentinin iqtisadi siyasət və sənaye məsələləri üzrə köməkçisi Natiq Əmirov, maliyyə naziri Samir Şərifov, Mərkəzi Bankın sədri Elman Rüstəmov, Maliyyə Bazarlarına Nəzarət Palatası Direktorlar Şurasının sədri Rüfət Aslanlı və Dövlət Neft Fondunun icraçı direktoru Şahmar Mövsümov iştirak ediblər.

İclasda Maliyyə Sabitliyi Şurasının Katibliyi tərəfindən icmal-hesabat təqdim edilib. Hesabatda ölkədə gedən makroiqtisadi proseslərin, habelə Maliyyə Sabitliyi Şurası tərəfindən 2016-cı ilin sonunda qəbul edilmiş "2017-ci ilə və ortamüddətli dövrə makroiqtisadi və maliyyə sabitliyinin təmin olunması üzrə tədbirlər planı”nın icra vəziyyəti öz əksini tapıb.

Müzakirələr zamanı qeyd edilib ki, Prezident İlham Əliyevin sədrliyi ilə keçirilən Nazirlər Kabinetinin 2017-ci ilin 9 ayının sosial-iqtisadi inkişafının yekunlarına və qarşıda duran vəzifələrə həsr olunan geniş iclasında vurğulandığı kimi, cari ilin 9 ayında ölkə iqtisadiyyatının inkişafında pozitiv dinamika müşahidə edilib və bu dinamikanın formalaşmasında makroiqtisadi sabitlik xüsusi rol oynayıb.

Qeyd edilib ki, ölkənin tədiyə balansında profisit bərpa olunub, strateji valyuta ehtiyatları artıb: “Tədiyə balansı göstəricilərinin yaxşılaşmasına neftin dünya qiymətinin yüksəlməsi ilə yanaşı, mal və xidmət idxalı üzrə azalma meyilinin davam etməsi, eləcə də qeyri-neft sektoru üzrə ixracın genişlənməsi təsir göstərib”.

İclasda bildirilib ki, valyuta bazarında da vəziyyət stabilləşib, valyuta təklifinin tələbi üstələməsi şəraitində manatın ABŞ dollarına nəzərən məzənnəsi ilin əvvəlindən möhkəmlənib. Manatın qeyri-neft sektoru üzrə real effektiv məzənnəsi isə 2015-ci ilin əvvəlindən bəri 38 faizdən çox ucuzlaşıb ki, bu da ixracın artımına və idxalın əvəzlənməsinə əhəmiyyətli təsir göstərir:

“Makroiqtisadi sabitliyin bərpası qeyri-neft sektorunda iqtisadi aktivliyin yüksəlməsinə şərait yaradır. Yanvar-sentyabr aylarında qeyri-neft sektorunda 2.5 faizlik iqtisadi artım qeydə alınıb”.

Dövr ərzində həyata keçirilən monetar siyasət iqtisadiyyatın, ilk növbədə, fiskal sektorun pula olan tələbatını nəzərə aldığını, pul bazasının həcminin iqtisadiyyatın tələbatını ödəyəcək səviyyədə artdığı bildirilib: “Pul bazasının artımının məzənnə və qiymətlər sabitliyinə təsirini neytrallaşdırmaq üçün tədbirlər görülüb”.

Maliyyə sisteminin dayanıqlılığının təmin edilməsi, o cümlədən, "Azərbaycan Beynəlxalq Bankı”nın sağlamlaşdırılması və bank sisteminin kapitallaşdırılması istiqamətində tədbirlərin davam etdirildiyi də qeyd olunub.

İclasda "2017-ci ilə və ortamüddətli dövrə makroiqtisadi və maliyyə sabitliyinin təmin olunması üzrə tədbirlər planı”na uyğun olaraq hazırlanmış "Fiskal qaydalar”, "Dövlət borcunun idarə edilməsi üzrə orta və uzunmüddətli strategiya”, "Pul bazarının inkişafı proqramı” və 2018-ci ilin makroiqtisadi sabitlik çərçivəsi ətraflı müzakirə edilib.

Yekunda ilin qalan dövründə də makroiqtisadi sabitliyin qorunmasının və maliyyə sabitliyinin təmin edilməsi tədbirlərinin davam etdirilməsinin vacibliyi vurğulanıb. İnflyasiyanın azalmasına nail olmaq üçün çevik və əlaqələndirilmiş makroiqtisadi siyasətin həyata keçirilməsinin vacibliyi xüsusilə qeyd edilib.

Dayanıqlı makroiqtisadi sabitlik əsasında iqtisadi artımın daha da sürətləndirilməsi üçün struktur və institusional sahədə islahatların dərinləşdirilməsinin vacibliyi də diqqətə çatdırılıb.

Reyting.az




Bölməyə aid digər xəbərlər
{sape_links}{sape_article}