13:33 / 26-09-2018
Soyuqdan donub öldü - Foto
“Elektron hökumət”ə müraciətlərin sayı 23 milyonu ötüb
Tarix: 14-07-2018 14:01 | Bölmə: Layihə / Xəbər lenti
“Elektron hökumət”ə müraciətlərin sayı 23 milyonu ötüb

Azərbaycanda “Elektron hökumət”in formalaşdırılması prosesi artıq özünün yüksəliş dövrünü yaşayır. Son illər bu istiqamətdə həyata keçirilən tədbirlər, müxtəlif dövlət qurumlarının “Elektron hökumət” sisteminə inteqrasiyasında ciddi dönüş yaradıb.

İstər əhalinin əlçatanlığı, istər zaman itkisinin qarşısının alınması, istərsə də məmur-vətəndaş münasibətlərində neqativ halların aradan qaldırılması baxımında kifayət qədər irəliləyişlər əldəedilib. Bunun nəticəsidir ki, artıq istənilən vətəndaş evdən, yaxud iş yerindən internet üzərindən hansısa dövlət qurumuna virtual müraciət edir və lazım olan sənədi alır, yaxud hansısa sənədi təqdim edir.

Bu imkanlar genişləndikcə vətəndaşların da “Elektron hökumət”ə müraciətləri artır. Məlumat üçün bildirək ki, 2017-ci ildə Nəqliyyat, Rabitə və Yüksək Texnologiyalar Nazirliyinin Məlumat Hesablama Mərkəzinin (MHM) operatoru olduğu “Elektron hökumət” portalı üzərindən elektron xidmətlərə müraciət edənlərin sayı 23 milyondan çox olub.

Daha 41 xidmət inteqrasiya edib

Bu müddət ərzində "Elektron hökumət" portalı üzərindən ən çox müraciət olunan 10 qurum aşağıdakılardır:

– Əmək və Əhalinin Sosial Müdafiəsi Nazirliyi - 9.341.135

– Nəqliyyat, Rabitə və Yüksək Texnologiyalar Nazirliyi - 8.327.251

– Dövlət İmtahan Mərkəzi - 3.173.948

– Dövlət Gömrük Komitəsi - 961.392

– "Azərsu" ASC - 347.243

– Əmlak Məsələləri Dövlət Komitəsi - 103.965

– Daxili İşlər Nazirliyi - 96.568

– Ədliyyə Nazirliyi - 58.253

– Prezident yanında Mənzil İnşaatı Dövlət Agentliyi - 54.417

– Dövlət Miqrasiya Xidməti - 52.053.

Statistikaya əsasən, 2017-ci ildə portalın təqdim etdiyi xidmətlərə müraciət sayı 23 milyondan artıq olub. Həmçinin, ötən il portalda qeydiyyatdan keçmiş istifadəçilərin sayı 200 minə yaxınlaşıb, ümumilikdə isə portalda qeydiyyatdan keçmiş istifadəçilərin sayı 700 minə yaxındır.

Vətəndaşların marağına səbəb olan Azərbaycan Respublikasının Prezidenti yanında Mənzil İnşaatı Dövlət Agentliyinin (MİDA) “Güzəştli mənzil sistemi”, “Elektron ipoteka sistemi” kimi bır sıra sosial xidmətlər də elektronlaşdırılaraq portala inteqrasiya olunub. Eyni zamanda, portal dövlət qurumları arasında məlumat mübadiləsini də həyata keçirir.

Məlumat üçün qeyd edək ki, MİDA-nın “Güzəştli mənzil sistemi” üçün, 5 dövlət qurumu ilə 7 məlumat mübadiləsi, “Elektron ipoteka sistemi” üçün isə 5 dövlət qurumu ilə 16 məlumat mübadiləsi aparılır.

2017-ci il ərzində “Elektron hökumət” portalına 41 yeni elektron xidmət inteqrasiya edilib. Bununla da hazırda portalda olan e-xidmətlərin sayı ümumilikdə 442-ə çatdırılıb.

"Elektron hökumət” portalı tərəfindən təqdim olunan e-xidmətlərdən vətəndaşlarımızın daha çox və səmərəli şəkildə faydalanmaları məqsədilə MHM və Nazirliyin Elektron-Hökumət Təlim Tədris Mərkəzi tərəfindən Bakı şəhərində və regionlarda mütəmadi olaraq həyata keçirilən maarifləndirmə, təbliğat-təşviqat tədbirləri, müsabiqələr və kampaniyalar 2017-ci ildə də davam etdirilib.

Əmanətçilər üçün elektron imkanlar

Nəzərə çatdıraq ki, 10 mart 2018-ci il tarixindən Əmanətlərin Sığortalanması Fondunun təqdim etdiyi "Əmanətçilərin şəxsiyyətini təsdiq edən sənəd məlumatlarının dəqiqləşdirilməsinə dair elektron müraciət" adlı elektron xidmət “Elektron hökumət” portalı üzərindən vətəndaşlara təqdim ediləcək.

Belə ki, əmanətçilər depozit məlumatlarının dəqiqləşdirilməsi üçün fonda müraciəti heç yerə getmədən, onlayn olaraq portal üzərindən edə biləcəklər. Bunun üçün ilk növbədə “Elektron hökumət” portalının təqdim etdiyi 4 autentifikasiya vasitələrinin birindən istifadə etməklə qeydiyyatdan keçmək vacibdir.

Bu zaman ilk olaraq vətəndaşın şəxsiyyət vəsiqəsi üzrə məlumatları ekranda görünür. Təqdim olunan anket üzrə tələb olunan digər zəruri məlumatları isə vətəndaş özü əlavə edir. İstifadəçi əlaqə nömrəsi, əmanət müqaviləsinin nömrəsi, e-mail vəəmanət müqaviləsinin tarixini qeyd edərək əmanətçinin təmsil olunduğu bank kateqoriyası üzrə ona uyğun olan bankı seçib,əmanət müqaviləsini əlavə edir və müraciətdəki məlumatların doğruluğunu təsdiq edib “Göndər” düyməsini sıxmaqla müraciətini göndərmiş olur.

Əmanətlərin Sığortalanması Fondu Azərbaycan Respublikası Prezidenti cənab İlham Əliyevin 9 fevral 2007-ci il tarixli Fərmanına əsasən yaradılıb, 2007-ci ilin 12 avqust tarixindən isə fəaliyyətə başlayıb. Fondunun yaradılmasında məqsəd banklar və xarici bankların yerli filiallarının ödəmə qabiliyyətini itirdiyi hallarda fiziki şəxslərdən əmanətə qəbul olunmuş pul vəsaitinin itirilmə riskinin qarşısını almaq, Azərbaycanda maliyyə və bank sisteminin sabitliyini və inkişafını təmin etməkdir.

Fiziki şəxslərin əmanətlərinin cəlb edilməsi üçün bank lisenziyasına malik olan bütün banklar və xarici bankların yerli filialları Fondun məcburi iştirakçılarıdır. İştirakçı bankların Azərbaycan ərazisindən kənarda yerləşən filiallarındakı əmanətlər Fond tərəfindən sığorta olunmur və onlar üzrə kompensasiya ödənilmir.

Kreditlər üçün elktron arayışlar veriləcək

Bu günlərdə “Elektron hökumət” portalı ilə əməkdaşlıq sayəsində “Bank Avrasiya” və “Molbulak” bank olmayan kredit təşkilatı kredit rəsmiləşdirilməsi üçün elektron arayış xidmətindən istifadəyə başlayıb. Adıçəkilən bank və kredit təşkilatı kredit əməliyyatları prosesinə elektron arayışları daxil edərək vətəndaşlara daha rahat xidmət təqdim edəcək. Bu elektron xidmət vasitəsilə vətəndaş heç yerə getmədən, vaxt itkisinə yol vermədən onlayn rejimdə portala daxil olaraq sistem tərəfindən avtomatik formalaşdırılan arayışı elektron şəkildə banka, yaxud kredit təşkilatına ünvanlaya bilər.

Qeyd edək ki, hazırda "Elektron hökumət" portalının istifadəçiləri 18 adda arayışı "Elektron hökumət" portalına giriş olmaqla formalaşdırmaq və ötürmək imkanına sahibdir.

"Azərsu” elektron xidmətlərini genişləndirir

"Azərsu” ASC istehlakçılara göstərilən müştəri xidmətlərinin asanlaşdırılması, bu sahədə şəffaflığın və operativliyin təmin edilməsi məqsədilə müasir informasiya texnologiyaların tətbiqini davam etdirir. "Elektron hökumət” portalı haqqında Əsasnamə”nin təsdiq edilməsi və elektron xidmətlərin genişləndirilməsi ilə bağlı tədbirlər barədə” ölkə Prezidentinin Fərmanına uyğun olaraq "Azərsu” ASC tərəfindən 13-cü - "Əhali qrupuna aid olan yeni istehlakçının qeydiyyata alınması" adlı elektron xidmət istifadəyə verilib.

"Azərsu”dan “Reytinq”ə bildiriblər ki, bu xidmət vasitəsilə əhali qrupu üzrə yeni istehlakçılar ASC-nin abonent bazasında abonent kimi qeydiyyata alınır. Adıçəkilən xidmətdən su və kanalizasiya şəbəkələrinə qoşulmaq üçün texniki şərt almış və şəbəkəyə qoşulmuş abonentlər istifadə edə bilər. Bunun üçün www.e-gov.az portalında qeydiyyatdan keçmiş vətəndaşlar portalın “Xidmətlər” bölməsində "Azərsu” ASC, daha sonra "Əhali qrupuna aid olan yeni istehlakçının qeydiyyata alınması" adlıelektron xidməti seçilməlidir. Müraciətin qeydiyyata alınması üçün vətəndaşlar aşağıda qeyd edilən məlumatları sistemə elektron formada daxil edilməlidir:

- Rayonun adı;

- İstehlakçının ünvanı (küçə/qəsəbə/kənd, ev nömrəsi, mənzil nömrəsi);

- Bina evi və ya həyət evi seçimi;

- İstehlakçının şəxsiyyət vəsiqəsinin FİN kodu;

- Texniki şərt sənədinin elektron formada yüklənməsi (zəruri olduqda);

- Mülkiyyəti təsdiq edən sənədin (çıxarış, sərəncam, bələdiyyəqərarı, order və s.) elektron formada yüklənməsi;

- Yaşayış yeri üzrə qeydiyyatda olan şəxslər haqqında arayışın elektron formada yüklənməsi;

- Müraciət edənin telefon nömrəsi;

- Müraciət edənin elektron poçt ünvanı;

- Müraciətlə bağlı qeydlər.

Təqdim olunan məlumatlar düzgün olduğu təqdirdə müraciət icra olunur və abonentin elektron poçt ünvanına yeni müqaviləni imzalaması üçün Su-kanal İdarəsinə yaxınlaşması barədə bildiriş göndərilir. Əgər abonentin təqdim etdiyi hər hansı məlumatda yanlışlıq və ya anlaşılmazlıq aşkar edilərsə, bu barədə onun elektron poçt ünvanına məlumat ötürülür və məlumatın dəqiqləşdirilməsi tələb olunur.

Texniki şərt almış istehlakçılar bu xidmət vasitəsilə "Azərsu” ASC-nin abonent bazasında qeydiyyata alınır, su təchizatı və kanalizasiya xidmətlərinin göstərilməsi üçün onlarla müqavilə bağlanır və abonent kodu verilir.

Qeyd edək ki, "Elektron hökumət” portalının operatoru Nəqliyyat, Rabitə və Yüksək Texnologiyalar Nazirliyinin Məlumat Hesablama Mərkəzinin 2017-ci il üzrə açıqladığı statistikaya əsasən, "Azərsu” ASC elektron xidmətlərdən istifadə sayına görə 5-ci yeri tutub. Ötən il elektron xidmətlərlə əlaqədar ASC-yə 347 min, bu ilin 6 ayında isə 225 min müraciət daxil olub.

20 mindən çox “E-imza” sertifikatı

Onu da qeyd edək ki, “Elektron hökumət” sistemində mühüm mexanizmlərdən biri də “E-imza”dır. Bu istiqamətdə də inkişaf hiss olunmaqdadır. Belə ki, cari ilin birinci yarısında 20 mindən çox “E-imza” sertifikatı istifadəyə verilib. Bu, ötən ilin müvafiq dövrü ilə müqayisədə təxminən 2 dəfə çoxdur. Ölkədə “Elektron imza” (E-imza) sertifikatlarının sayının artması ilə yanaşı, onun istifadə miqyası da genişlənməkdədir.

Nəqliyyat, Rabitə və Yüksək Texnologiyalar Nazirliyinin mətbuat xidmətindən bildiriblər ki, nazirliyin Məlumat Hesablama Mərkəzinin Milli Sertifikat Xidmətləri Mərkəzi tərəfindən 2018-ci ilin ilk 6 ayı ərzində istifadəyə verilən “E-imza” sertifikatlarının sayı 20 454 olub. Bu sertifikatlardan 6 780-i dövlət qurumlarının, 4 542-i fiziki şəxslərin, 9 132-i isə hüquqi şəxslərin payına düşür.


Qeyd edək ki, ötən ilin müvafiq dövründə istifadəyə verilən sertifikatların sayı 10 582 (dövlət qurumları üzrə 3 440, hüquqi şəxslər üzrə 4 560, fiziki şəxslər üzrə 1 580) olub.

İstifadəyə verildiyi gündən cari ilin iyulun 1-nə olan statistikaya əsasən, ümumilikdə 146 874 “E-imza” sertifikatı istifadəyə verilib. Onlardan 82 390-ı dövlət qurumları üzrə, 35 590-ı hüquqi şəxslər üzrə, 28 894-ü isə fiziki şəxslər üzrə olub.

Son bir ayda istifadəyə verilən “E-imza” sertifikatlarının sayı 2 mindən çox olub. Belə ki, bu ilin iyun ayında verilən 2 184 “E-imza” sertifikatının 820-i dövlət qurumlarının, 1 084-ü hüquqi şəxslərin, 280-i isə fiziki şəxslərin payına düşüb.

Sözsüz ki, “E-imza” istifadəçilərinin sayının artması aparılan əməliyyatların sayının artmasına da təsir göstərir. Bu günə qədər dövlət qurumları tərəfindən 28 869 002, hüquqi və fiziki şəxslər tərəfindən 8 435 955 olmaqla, ümumilikdə 37 304 957 autentifikasiya və elektron imza əməliyyatı aparılıb. 2018-ci ilin ilk 6 ayı ərzində isə aparılan əməliyyatların ümumi sayı 7 433 407 olub ki, bu da ümumi əməliyyatların təqribən 20 faizi deməkdir. Onlardan dövlət qurumlarının payına toplam olaraq 5 663 144, hüquqi və fiziki şəxslərin payına isə toplam 1 770 263 autentifikasiya və “Elektron imza” əməliyyatı düşüb.

“E-imza” - virtual məkanda şəxsiyyəti müəyyənləşdirmə vasitəsidir. Azərbaycan Respublikasının qanunlarına əsasən, “elektron imza” ilə imzalanan elektron sənədlər əl imzası iləimzalanan və möhürlənən sənədlərə bərabər tutulur. “E-imza”nın əsas mahiyyəti informasiyanı hazırlayan şəxsin həqiqiliyinin yoxlanılması, informasiyanın təsdiq edilməsi və elektron sertifikat vasitəsilə elektron məlumata əlavə edilən və məlumatı göndərəni təyin edən bir ədədi koddur.

Z.MƏMMƏDLİ

Yazı Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun maliyyə yardımı ilə "İnformasiya və kommunikasiya texnologiyalarının inkişaf etdirilməsi” layihəsi çərçivəsində hazırlanıb.




Bölməyə aid digər xəbərlər
23-09-2018, 19:27 Bu uşaq metroda doğulub