13:25 / 25-09-2017
Lümpenləşən ziyalılar
Məşədi İbad səhnəyə qayıdır
Tarix: 13-09-2017 13:15 | Bölmə: Mədəniyyət
Məşədi İbad səhnəyə qayıdır

2017-ci il 18-26 sentyabr tarixlərində Heydər Əliyev Fondu və Azərbaycan Respublikasının Mədəniyyət və Turizm Nazirliyinin təşkilatçılığı ilə Üzeyir Hacıbəyli IX Beynəlxalq Musiqi Festivalı keçiriləcək. Artıq beynəlxalq mədəni arenada kifayət qədər böyük nüfuza malik olan bu mötəbər tədbir zəngin və rəngarəng reqlamentə malikdir. Azərbaycan Dövlət Musiqili Teatrı həmişəki kimi bu il də Ü. Hacıbəyli IX Beynəlxalq Musiqi Festivalında iştirak edəcək.

Qurumun mətbuat katibi Samir Sədaqətoğlu Reyting.az-a bildirib ki, Dövlət Musiqili Teatrı festivalda dahi Üzeyir Hacıbəylinin ölməz “Arşın mal alan” və “O olmasın, bu olsun” operettalarını nümayiş etdirəcək.

“Üzeyir Hacıbəyli Azərbaycan xalqının bəşəriyyətə bəxş etdiyi ən böyük simalardan biridir. Belə şəxsiyyətlər yüz ildən, min ildən bir yaranır. Böyük novator olan Üzeyir bəyin milli mədəniyyətimizə bəxş etdiyi töhfələr təkcə bizim xalqımızın deyil, ümumiyyətlə, Yaxın Şərqin tarixində bir ilkdir. Elə bizim teatrın əsası da cəhalətin və xurafatın daha çox hökmran olduğu 1910-cu ildə Üzeyir bəyin “Ər və arvad” iki hissəli musiqili komediyası ilə qoyulub. Hazırda cari repertuarımızda Üzeyir bəyin 3 əsəri yer alır. Hər tamaşada tamaşaçı salonu demək olar ki, dolu olur. Bu, ilk növbədə xalqımızın Üzeyir Hacıbəylinin əbədiyaşar irsinə verdiyi qiymətin göstəricisidir. Kollektivimiz Ü.Hacıbəyli IX Beynəlxalq Musiqi Festivalına xüsusi hazırlaşıb. Festival tədbirləri çərçivəsində iki gün ard-arda “Arşın mal alan” və “O olmasın, bu olsun” tamaşaları ilə çıxış edəcəyik. Tamaşaları İran İslam Respublikasının tanınmış musiqiçilərindən biri, məşhur dirijor Bərdia Kiyarəs idarə edəcək. Bu ünlü sənətçi məhz Ü.Hacıbəyli IX Beynəlxalq Musiqi Festivalında iştirakımızla bağlı Bakıya dəvət olunub. Hazırda Bakıda olan Bərdia Kiyarəsin teatrımızda orkestrlə, aktyor heyəti ilə məşqləri davam edir”, - deyə Musiqili Teatrın direktoru Əliqismət Lalayev söyləyib.

Qeyd edək ki, “Arşın mal alan” tamaşası 23 senytabr, “O olmasın, bu olsun” əsəri isə 24 sentyabr tarixində saat 19.00-da Azərbaycan Dövlət Musiqili Teatrında nümayiş olunacaq.



81 dəfə oxunub.

Bölməyə aid digər xəbərlər