Prezident Administrasiyasına şöbə müdiri təyin edilib - Sərəncam
Tarix: 17-01-2018 18:42 | Bölmə: Slayd
Prezident Administrasiyasına şöbə müdiri təyin edilib

Azərbaycan Respublikası Prezidenti Administrasiyasının millətlərarası münasibətlər, multikulturalizm və dini məsələlər üzrə şöbəsinin baş məsləhətçisi Etibar Nəcəfov bu şöbənin müdiri təyin edilib.

Azərbaycan prezidenti İlham Əliyev bununla bağlı müvafiq sərəncam imzalayıb. Sərəncama əsasən, millətlərarası münasibətlər, multikulturalizm və dini məsələlər şöbəsinin müdiri vəzifəsinə Etibar Nəcəfov təyin edilib.

Qeyd edək ki, hazırda Azərbaycan Respublikası Prezidenti Administrasiyasında Humanitar siyasət məsələləri şöbəsi və İnnovativ inkişaf və elektron hökumət məsələləri şöbəsinin müdiri vəzifəsi boşdur.

Etibar Əli oğlu Nəcəfov 1963-cü il martın 7-də Azərbaycan SSR-nin Gəncə şəhərində ziyalı ailəsində anadan olub. Atası və anası müəllim işləyiblər. 1980-ci ildə Daşkəsən rayonu A.S.Puşkin adına orta məktəbi bitirib, elə həmin ildə Leninqrad Dövlət Universitetinin fəlsəfə fakültəsinə qəbul olub. 1985-ci ildə həmin universiteti fərqlənmə diplomu ilə bitirib və universitetin fəlsəfə fakültəsinin əyani aspiranturasına "Sosial fəlsəfə” ixtisası üzrə qəbul olub. 8 dekabr 1988-ci ildə "Elmi-texniki tərəqqinin sürətlənməsində imkan və gerçəklik dialektikası" mövzusunda namizədlik dissertasiyası müdafiə edib. 27 fevral 2004-cü ildə "Mədəniyyətinin və sivilizasiyanın ictimai inkişafda dialektikası” mövzusunda doktorluq dissertasiyası müdafiə edib. 1989-cu ildən Bakı Slavyan Universitetində müəllim, baş müəllim, dosent, Beynəlxalq əlaqələr üzrə prorektor, kafedra müdiri vəzifələrində işləyib. Bakı Slavyan Universitetində "Avropaşünaslıq” kafedrasının professoru və Azərbaycan Respublikasının Prezidenti yanında Dövlət İdarəçilik Akademiyasında "Fəlsəfə və Sosial Psixologiya” kafedrasının müdiri vəzifəsində işləyir. Azərbaycan Respublikasının millətlərarası, multikulturalizm və dini məsələlər üzrə Dövlət müşavirliyində çalışıb.

70-dan artıq elmi məqalənin, 4 monoqrafiyanın və 1 dərsliyin müəllifidir. ABŞ-ın bir sıra ştatlarında, Norveç, Rusiya, Türkiyə, İsveç, Macarıstan, Avstriya, Hollandiya, Qazaxstan, Gürcüstan və digər ölkələrdə beynəlxalq konfranslarda elmi məruzələrlə çıxış edib. 2002-2005- ci illərdə fasilələrlə Nyu-Yorkun Kolumbiya Universitetinin Beynəlxalq və İctimai Əlaqələr Məktəbində magistrlara dərs deyib. Tədris və tədqiqat sahəsinə aid ABŞ-ın və bir neçə Avropa ölkələrinin təsis etdiyi qrantlara layiq görülüb.




Bölməyə aid digər xəbərlər