Oğru və qəhrəman
Tarix: 21-08-2017 13:18 | Bölmə: Nadir QOCABƏYLİ
Oğru və qəhrəman
Bəzi dostlar yazır ki, camaatımız niyə oğru Rövşən Lənkəranskinin heykəlinə hörmətlə yanaşır, onun yasında kütləvi iştirak edir, amma deputatın sosialist əməyi qəhrəmanı atasına qoydurduğu heykəli rədd edir?
Maraqlı sualdır. Amma cavabında xalq günahlandırılır, onun yolunu azdığı bildirilir.
Mən bu yanaşma ilə o qədər də razı deyiləm. Xalqı qınamaq asandır, bəzən mən də qınayıram, amma arada onu başa düşməyə, anlamağa da çalışmaq lazımdır.
Xalq qəhrəmanları sevir, o daim ağ atlı oğlan, xilaskar arzusundadır, İsa Məsihin yenidən zühurunu, zamanın sahibi Mehdinin qayıtmasını gözləyir.
Bu mənada Rövşəni, oğru olsa da, əmək qəhrəmanından daha çox qəhrəman kimi görür.
Mən Rövşəni tanımıram, haqqında məlumatım da, demək olar ki, yoxdur, amma Rövşən kimiləri adətən həyatdakı ədalətsizliklər oğurluğa, əyri yola vadar edir. Onlar əsasən varlılardan oğurlayır, o adamlardan ki, onların var-dövlətində kasıbların alın təri, qanı var. Onlar varlılardan oğurladıqlarından, daha sonrakı mərhələdə isə zorla aldıqlarından kasıblara pay verirlər. Onlar öz anlayışları səviyyəsində heç vaxt haqqı nahaqqa vermirlər. Bəlkə də, nəyəsə haradasa düzgün yanaşmırlar, səhvə yol verirlər, ancaq düzgün yolda olduqlarına inanır və bunu gizlətmirlər. Onlar mübahisəli məsələləri dövlətin ədalət məhkəmələrindən daha ədalətli həll edirlər və xalq da bunu bilir. İzah edə bilməsə də, şüuraltı dərk edir və onları qəhrəman sayır.
Gələk sosialist əməyi qəhrəmanı Gülabdaya. Onu da tanımıram, fəaliyyətindən, necə qəhrəman olmasından da xəbərim yoxdur. Amma hamımız bu əmək qəhrəmanlarının necə qəhrəman olduğunu çox yaxşı xatırlayırıq. Onlar bəlkə də zəhmətkeş, çalışqan olublar, amma sovet dövrünün pripiskaları, saxtalıqları o qəhrəmanları çox zaman istehza hədəfinə çevirib. Çünki 5 nəfərin yığdığı pambıq bir adamın adına yazılıb, daha zəhmətkeş olanlar kölgədə qalıb, sosializm yarışını stimullaşdırmaq üçün saxta qəhrəmanlar qondarılıb. Və o qəhrəmanların xalqa demək olar ki, heç bir xeyirləri dəyməyib. Bir sınıq barmağa məlhəm olmayıblar. Ancaq özləri, ailələri, övladları üçün çalışıblar. Sinələrindəki orden-medalların xeyrini yalnız özləri görüblər və hələ də övladları görürlər. Xalq da kor deyil və bütün bunları görür.
İki şəxsə fərqli münasibət xalqla dövlət arasındakı uçurumun nə qədər dərin olduğunu göstərir. Xalq öz qəhrəmanlarını tanıyır, dövlətin ona sırıdıqlarını isə sadəcə qəbul etmir.




Bölməyə aid digər xəbərlər