Rusiyada “Porsche” avtomobillərinin sahibləri maşınlarının peyk vasitəsilə bloklanması ilə üzləşiblər.

Reyting.az xəbər verir ki, “Rolf” diler mərkəzinin məlumatına görə, noyabrın 28-dən etibarən standart siqnalizasiya sisteminin kütləvi şəkildə sıradan çıxması səbəbindən xidmətə müraciətlərin sayı artıb. Sürücülər Moskva, Krasnodar və Rusiyanın digər şəhərlərindən oxşar şikayətlər ediblər.

Qeyd olunur ki, bütün modellərdə peyk əlaqəsi kəsilib və proses bu templə davam edərsə, istənilən avtomobil bloklana bilər.

Məlumata görə, bloklamanı yalnız siqnalizasiya sistemini söküb yenidən işə salmaqla aradan qaldırmaq mümkündür. Lakin problemin səbəbi hələ də məlum deyil. Bundan əlavə, dekabr ayında problemin həll ediləcəyi ilə bağlı verilən vədlər də özünü doğrultmayıb. Bir çox rusiyalıların fikrincə, bu vəziyyət böyük ehtimalla qəsdən yaradılıb.

“Mercedes-Benz” avtomobillərində də oxşar hallar qeydə alınıb, lakin həmin avtomobillər tam bloklanmır.

Xatırladaq ki, “Porsche” 2022-ci ildən etibarən Rusiyaya rəsmi tədarükü dayandırsa da, şirkət bazarı tam tərk etməyib.

Oqtay QORÇU