Ukraynanın paytaxtı Kiyevdəki çoxmənzilli binaların yarısı - təxminən altı mini Rusiyanın hücumu nəticəsində istiliksizdir.

Reyting.az xəbər verir ki, bunu Kiyev meri Vitali Kliçko bildirib.

Onun sözlərinə görə, şəhərdə su təchizatında da fasilələr var.

“Kommunal xidmət işçiləri sosial müəssisələri, xüsusən də xəstəxanaları və doğum evlərini səyyar qazanxanalarla təmin ediblər. Onlar enerji işçiləri ilə birlikdə Kiyev sakinlərinin evlərinə elektrik enerjisi və istiliyi bərpa etməyə çalışırlar. Bunu mümkün qədər tezləşdirmək istəyirik”, - deyə o, “Telegram”-da yazıb.

Kliçko vurğulayıb ki, Kiyevə hücum paytaxtın vacib infrastrukturu üçün ən ağrılı hücum olub: “Şəhər xidmətləri təcili rejimdə işləsələr də, təəssüf ki, yaxın günlərdə havaların daha da soyuyacağı proqnozlaşdırılır”.

Kiyev meri enerji və istilik mənbələrinin olduğu digər şəhərlərə müvəqqəti getmək imkanı olan sakinlərə müraciətində deyib ki, paytaxtı tərk etsinlər.

Xatırladaq ki, bu gecə rus ordusunun vacib infrastrukturu atəşə tutması səbəbindən Kiyevin bəzi rayonlarında istilik sistemi sıradan çıxıb. Xüsusilə, Desnyanski və Peçerski rayonlarında, eləcə də Qoloseyevski, Darnitski, Dneprovski, Obolonski, Podilski, Solomyanski və Şevçenkivski rayonlarının bəzi yerlərində istilik ya mövcud deyil, ya da azaldılıb.

Kiyevin sol sahilində təcili elektrik kəsintiləri də qüvvədədir. Lakin sağ sahildə əvvəllər dərc edilmiş cədvəllər qüvvədə qalır.

Kiyev Şəhər Dövlət Administrasiyası bildirib ki, son atəşdən sonra yaranmış çətin enerji vəziyyəti səbəbindən paytaxtda ictimai nəqliyyat dəyişikliklərlə işləyir və metro xidmətləri məhdudlaşdırılıb. Saat 11:05-dən etibarən metronun qırmızı xəttində xidmət normal vəziyyətə gətirilib.

ELÇİN