“Rusiya rəhbəri Vladimir Putinin ordunu saxlamaq və müharibə aparmaq üçün strateji ehtiyatları yoxdur. Buna görə də, o, müharibədə fasilə əldə etmək üçün hər hansı bir vəd verməyə hazırdır ki, sonradan Ukraynaya yenidən zərbə endirə bilsin”.

Reyting.az xəbər verir ki, bunu ukraynalı general-mayor Sergey Krivonos bildirib.

Onun sözlərinə görə, Rusiya lideri 2026-cı il üçün maliyyə dəstəyində ciddi və əhəmiyyətli çatışmazlıqla üzləşib.

“Bu, aprel və ya may aylarında öz təsirini göstərəcək. Keçən il Rusiyanın neft və qaz sənayesinə sistemli hücumlarımızı nəzərə alsaq, təkcə ilin birinci yarısında Rusiyanın büdcə gəlirlərini 22-24 faiz azaltdıq və ikinci yarı üçün rəqəmlər eynidir”, - deyə təqaüdçü general-mayor izah edib.

S. Krivonosun iddiasına görə, Putin kifayət qədər resurslara malik olduğunu deməsi həqiqəti əks etdirmir. Əslində, Putinin fasiləyə və Rusiyaya qarşı sanksiyaların ləğvinə ehtiyacı var və o, bu fasiləni təmin etmək üçün hər şeyə söz verəcək.

“Mən atəşkəsə, hətta zəmanətlərə də inanmıram. Biz dəfələrlə daha çətin vəziyyətlə üzləşmişik. Ən çətin vəziyyətimiz Rusiya, ABŞ və Böyük Britaniyanın bizə hər şeyin yaxşı olacağına söz verdiyi Budapeşt Memorandumu olub. Amma işlər yoluna qoyulmayanda hamı bizim səhv başa düşdüyümüzü dedi. Rusiya isə heç nə demədi - sadəcə, işləri pozdu. Buna görə də təhlükəsizliyimizin ən yaxşı qarantı öz güclü ordumuz, güclü iqtisadiyyatımız, təlim keçmiş və motivasiyalı xalqımız olacaq”,- deyə general əlavə edib.

V. QULİYEV