ABŞ-ın İslandiyadakı səfiri postuna namizəd olan şəxsin İslandiyanın Amerikanın 52-ci ştatı ola biləcəyi ilə bağlı zarafatı islandiyalıların ciddi narazılığına səbəb olub.

Reyting.az xəbər verir ki, minlərlə insan potensial səfirin bu fikirlərinə etiraz olaraq petisiya imzalayıb.

Rəsmilərin jurnalistlərə verdiyi məlumata görə, ABŞ-ın İslandiyadakı səfiri postuna namizəd Billi Lonq “İslandiya 52-ci ştat olacaq, mən isə onun qubernatoru olacağam”,- ifadəsini zarafatla səsləndirib.

Billi Lonq bu açıqlamanı ABŞ prezidenti Donald Trampın Qrenlandiyanı ABŞ-ın nəzarətinə götürmək niyyəti ilə bağlı müzakirələrin aparılacağı, Qrenlandiya və Danimarkanın yüksək vəzifəli rəsmilərinin ABŞ nümayəndələri ilə görüşündən əvvəl səsləndirib.

İslandiya Xarici İşlər Nazirliyi məsələyə aydınlıq gətirmək üçün ABŞ səfirliyi ilə əlaqə saxladığını açıqlayıb. Eyni zamanda islandiyalılar ölkənin xarici işlər naziri Katrin Qunarsdottirə müraciət edərək Lonqun namizədliyinin rədd edilməsi tələbi ilə petisiya başladıb.

Petisiyada qeyd olunur ki, hətta Lonqun açıqlamaları zarafat xarakterli olsa belə, bu, azadlıqları uğrunda mübarizə aparmış və hər zaman ABŞ-ın dostu olmuş İslandiya dövləti və xalqına qarşı hörmətsizlikdir.

Bir müddət sonra Billi Lonq səsləndirdiyi fikirlərə görə üzr istəyib. O bildirib ki, bu şərhlər zarafat məqsədi daşıyıb və başqalarının ABŞ prezidentinin Qrenlandiya üzrə xüsusi elçisi Ceff Lendri barədə zarafatlar etməsindən sonra səsləndirilib.

“Bu, ciddi bir məsələ deyildi. Mən üç ildir görüşmədiyim insanlarla birlikdə idim. Onlar Ceff Lendrinin Qrenlandiyanın qubernatoru olması ilə bağlı zarafat edirdilər. Daha sonra mənimlə bağlı da zarafatlar başladı. Əgər kimsə incidisə, üzr istəyirəm”, - deyə Lonq əlavə edib.

E. KAMAL