Avropa İttifaqının səfirləri Ukraynaya 90 milyard avroluq kreditin maliyyələşdirilməsi mexanizmini razılaşdırıblar. Bu pulun 30 milyard avrosu Ukraynanın büdcəsinin maliyyələşdirilməsinə, 60 milyard avrosu isə silah alışına yönəldiləcək. Avropa Komissiyası Avropa İttifaqının (Aİ) büdcəsindən kredit üzrə faiz ödəyəcək.

Reyting.az-ın məlumatına görə, Aİ Şurası bildirib ki, Şura Avropa Parlamenti ilə erkən razılaşma əldə etməyə çalışır ki, ilk ödəniş bu ilin ikinci rübünün əvvəlində həyata keçirilsin.

Kredit 2025-ci ilin dekabr ayında Aİ sammitində Rusiya aktivlərinin müsadirə edilməsi əvəzinə təsdiqlənib. Macarıstan, Çexiya və Slovakiya Kiyevin Aİ maliyyələşdirməsində iştirakdan imtina ediblər.

TASS-ın istinad etdiyi bəyanatda deyilir: "Bu qərar 24 Aİ ölkəsinin iştirakı ilə gücləndirilmiş tərəfdaşlıq proseduru çərçivəsində qəbul edilib".

"Politico"nun məlumatına görə, vəsait Avropa Komissiyasının borclanması yolu ilə toplanacaq və Kiyevin maliyyə çatışmazlığı ilə üzləşə biləcəyi yaza qədər Ukraynanı dəstəkləmək üçün istifadə olunacaq. Kredit üzrə faizlər, o cümlədən cari yeddi illik maliyyə planında istifadə olunmamış vəsaitlər Aİ büdcəsindən ödəniləcək. Hər hansı bir çatışmazlıq üzv dövlətlər tərəfindən ödəniləcək.

V. QULİYEV