Dünya üzrə qızılın bahalaşması ilə yanaşı, bu qiymətli metala olan tələbat da rekord səviyyəyə yaxınlaşır.

Reyting.az-ın məlumatına görə, ekspertlər bildiriblər ki, ilin əvvəlindən qızıl 50 faizdən çox bahalaşıb və bu günə qədər 2025-ci ilin oktyabr ayında qeydə alınmış 4380 dollar qiymətindəki tarixi səviyyəyə yaxındır. Bununla bağlı müxtəlif ehtimallar irəli sürülsə də, bir çox mütəxəssislərin fikrincə, bahalaşmanın əsas səbəbləri geosiyasi gərginlik, dolların zəifləməsi və inflyasiya təzyiqləridir.

Təqdim olunan yeni beynəlxalq statistikaya görə, üçüncü rübdə mərkəzi bankların qızıl alışı əvvəlki rüblə müqayisədə 28 faiz artıb.

Ümumdünya Qızıl Şurasının (ÜSQ) hesabatından da göründüyü kimi, hazırda qızıl dünya üzrə ən etibarlı, həmçinin "məğlubedilməz" qiymətli, dayanıqlı metaldır. ÜQŞ-nın rəsmi açıqlamasına görə, 2024-cü ilin sonundan indiyə qədər istismar edilmiş qızılın ümumi həcmi 216 265 tona çatıb ki, bu da hazırkı bazar qiyməti ilə təxminən 29 trilyon dollar dəyərində qızıl deməkdir.

Qeyd olunur ki, yeraltı qızıl ehtiyatı ilə birlikdə ümumi potensial 348 375 ton təşkil edir. Bu göstərici dünyada hələ çıxarılmamış 132 110 tona yaxın qızılın olduğu anlamına gəlir ki, bu da, məlum ehtiyatların 38 faizinə bərabərdir. 

Mütəxəssislər bildiriblər ki, illik hasilat tempinə əsasən, mövcud ehtiyatlar 40 ilə qədər kifayət edəcək, həmçinin bəzi analitiklərin ehtimal etdiyi kimi, dünyanın qızıl ehtiyatları çox tezliklə tükənməyəcək.

Ekspertlərin fikrincə, hazırda dünyanın bir çox ölkələrində istismar edilməyən, eyni zamanda, öz sirrini açmayan qızıl yataqları mövcuddur və belə yataqların ümumi qızıl ehtiyatları hələ ki, məlum deyil.

Oqtay QORÇU