Qarabağ Komitəsində dəyişiklik olub - Fotolar
Tarix: 20-06-2019 05:40 | Bölmə: Xəbər lenti
Qarabağ Komitəsində dəyişiklik olub

Dünən KXCP qərargahında Qarabağ Komitəsinin növbəti iclası keçirilib. İclasın gündəliyində təşkilati məsələlər, qərarların icra vəziyyəti, Qarabağ ətrafında baş verən hadisələrin analizi və təhlili məsələləri dayanıb.

Reyting.az
xəbər verir ki, təşkilati məsələlər müzakirə olunarkən KXCP üzvü Elxan Məmmədli yekdilliklə Qarabağ Komitəsinə üzv qəbul edilib.

Azərbaycan milli demokratik hərəkatının tanınmış simalarından biri, Qarabağ müharibəsində batalyon komandiri, “Başkənd” əməliyyatının iştirakçısı, Müdafiə nazirinin qərb bölgəsi üzrə məsul nümayəndəsi vəzifələrində çalışmış, siyasi elmlər doktoru Sabir Məmmədli də yekdilliklə Komitə sıralarına qəbul olunub. Bundan başqa, tanınmış ictimai fəal, Avropa-Azərbaycan hərəkatının sədri Ramin Hacılı da yekdilliklə Qarabağ Komitəsinin sıralarına daxil edilib.

Qarabağ Komitəsində dəyişiklik olub

Qərarların icra vəziyyətinə gəlincə, bu barədə Qarabağ Komitəsinin İdarə Heyətinin üzvü Əlövsət Sadıqlı məruzə edib. O, Komitənin mitinqlərlə bağlı məhkəmə işlərində maraqlı və presedent ola biləcək hadisələrin baş verdiyi haqqında məlumat verib. Müzakirələr nəticəsində məlumat verilib ki, İnzibati-İqtisad məhkəmələrinin qərarlarına görə Bakı Şəhər İcra Hakimiyyətinin “qadağa” qərarlarında yazılan “məqsədəuyğun deyildir” sözləri, əslində bir qadağa yox, Bakı Şəhər İcra Hakimiyyətinin “subyektiv” fikirləridir. Belə çıxır ki, İcra Hakimiyyətinin qərarlarına məhəl qoymamaq, mitinqləri keçirmək lazım idi. Mövzu ətrafında keçmiş Baş Nazir Pənah Hüseyn də çıxış edib.

Gündəliyin sonuncu məsələsi ətrafında təhlükəsizlik eksperti, Qarabağ Komitəsinin İdarə Heyətinin üzvü İlham İsmayıl çıxışı dinlənilib. İ. İsmayıl son bir həftədə Qarabağ ətrafında baş verən hadisələri təhlil edib və Komitə üzvlərini məlumatlandırıb. Son günlərdə Qarabağ cəbhəsində formalaşan hərbi-siyasi vəziyyətlə əlaqədar müvafiq hakimiyyət orqanlarına məhdud səfərbərlik elan olunması məsələsinə baxılması üçün müraciət edilməsi, atəşkəsin beynəlxalq-hüquqi məzmunu barədə Azərbaycan tərəfinin mövqeyinin təcili açıqlanması tələbinin yenidən irəli sürülməsi haqqında qərarlar qəbul olunub.

Qarabağa – “Yurda qayıdış!” kampaniyalarının təşkil olunması haqqında Ramin Hacılının açıqlaması dinlənilib və bu tip kampaniyaların dəstəklənməsi haqqında qərarlar qəbul edilib.

Qarabağ Komitəsində dəyişiklik olub

Komitənin dünənki iclasında yeni dönəm sədri Sahib Kərimlinin sədrliyi ilə (Qeyd edək ki, Qarabağ Komitəsinin İdarə Heyətinin üzvü Sahib Kərimli əlifba sırası üzrə ötən həftədən 12 avqust 2019-cu ilə qədər Komitənin dönəm başqanı seçilib – red.) bu və ya digər məsələlər haqqında İlham İsmayıl, Pənah Hüseyn, Əhəd Məmmədli, Tural Abbaslı, Ramin Hacılı, Şakir Abbasov, Əlövsət Sadıqlı, Elxan Məmmədli, Sabir Məmmədli, Nazim Tapdıqoğlu, Əvəz Zeynallı və digər natiqlər çıxış edib, müəyyən məsələlərə münasibət bildiriblər.

Qarabağ Komitəsinin növbəti islası 26 iyun 2019-cu ildə, saat 12.00-da KXCP-nin qərargahında keçiriləcək.(Xural.com)
скачать dle 10.5фильмы бесплатно




Bölməyə aid digər xəbərlər
{sape_links}{sape_article}