İnzibati Xətalar Məcəlləsinə mədəni sərvətlərin razılaşdırılmadan toxunulmazlığını pozanlar barədə cəzalar sərtləşdirilməsi ilə bağlı dəyişikliklər edilir.

Reyting.az xəbər verir ki, bu, Milli Məclisin Hüquq siyasəti və dövlət quruculuğu və Mədəniyyət komitələrinin birgə keçirilən iclasında müzakirəyə çıxarılan "Tarix və mədəniyyət abidələrinin qorunması haqqında" qanuna təklif edilən dəyişiklikdə yer alıb.

Təklif olunan dəyişikliklərə əsasən, mədəni sərvətlərin mühafizə siyahısına daxil edilmiş mədəni sərvətlərin müvafiq icra hakimiyyəti orqanının müəyyən etdiyi orqanla (qurumla) razılaşdırılmadan başqa yerə köçürülməsinə, eləcə də onların toxunulmazlığını pozan və onlar üçün təhlükə yaradacaq tikinti-quraşdırma, bərpa, rekonstruksiya, konservasiya işlərinin və ya abadlaşdırma tədbirlərinin aparılmasına görə - fiziki şəxslər 3 min manat məbləğində, vəzifəli şəxslər 6ı min manat məbləğində, hüquqi şəxslər 20 min manat məbləğində cərimə ediləcək.

Qeyd edək ki, bundan əvvəl bu pozuntulara görə, cərimələr fiziki şəxslər üçün 1500 manat məbləğində, vəzifəli şəxslər 3 min manat məbləğində, hüquqi şəxslər 10 manat məbləğində idi.