“Hə, sən öl...” - Akif Cabbarlı yazır
Tarix: 15-01-2020 12:47 | Bölmə: Akif CABBARLI
“Hə, sən öl...”

Həyat etüdləri

Ötən əsrin 70-80-ci illərindən yaxşı tanıdığım, tələbəlik illərinin unudulmaz təəssüratı ilə qəlbimdə özünə möhkəm yer tutmuş dostlarımdan birinin (şərti adı qoy Rafiq olsun) bitib-tükənməyən baməzə söhbətləri vardı. Danışdığı və həmişə gündəmdə olan bir əhvalatı isə heç birimiz unutmamışıq.

Rafiqin atası çox yerlərdə çalışdıqdan sonra qərara gəlir ki, daha rahat, oturaq bir işin qulpundan yapışsın. Odur ki, baş memarla dil tapıb rayon mərkəzində o illərin termini ilə desək, özünə bir dəlləkxana açır. İlk günlər işlər pis getmir. Böyüklü-kiçikli bütün qonşular, hətta uzaq məhəllələrdən, qonşu kəndlərdən gələn müştərilər Rafiqin atasının xidmətindən razı qayıdırlar. Çox keçmir, vəziyyət qəlizləşir. Qohum-qardaş – bunlar isə saya-hesaba gələn deyildi – saçını, üzünü qırxdırır, “biz sənə borclu” deyib aradan sivişirlər. İş o yerə çatır ki, kişi heç işığın, suyun pulunu da yığa bilmir. Rafiq həmin vəziyyəti o vaxt bizə şipşirin Şirvan ləhcəsi ilə belə şərh eləmişdi:

- Hə, qardaşlar, bir gün Qaroğlan, bir gün Xanoğlan, sonra Əliqulu, Vəliqulu, daha sonra Qardaşəli, Səbzəli, dalınca da Atamoğlan, Ağamoğlan. Qırılmışlar bir deyil, beş deyil, əmioğlu, xalaoğlu, dayıoğlu gəlirlər, üz-gözlərini abıra saldırırlar, hamısı da pulsuz, sən öl. Dədəm axırda bağladı dəlləkxananı, işlədə bilmədi, sən öl. Ə, kişi oğlu, dədəm belə vəziyyətə dözəmmədi, axırda bankrot oldu, sən öl.

Rafiqin hər cümlənin axırında adəti üzrə üzümüzə bir “sən öl” çırpması bizə ləzzət edirdi. Bir gün ona qayıdıb dedim ki, ə, Rafiq, sən adama elə qıpqırmızı “sən öl” deyirsən ki, adam elə durduğu yerdəcə yıxılıb ölmək istəyir.

Cavabı nə olsa yaxşıdır, - hə, sən öl.

“Hə, sən öl...”
A. Cabbarlı

Bir gün də Rafiq universitetin dəhlizində bizə bildirdi ki, qarşıdakı tətil günlərində Moskvaya getməyə hazırlaşır. Səfərinin səbəbini, məqsədini soruşduq. Dedi ki, heç, Qaroğlanla Xanoğlan xərcimizi çəkəcəklər, gedəcöyük Moskvaya, sən öl, “Rossiya” mehmanxanasında yer alacooğ, sən öl. Yeyib-içib yatacooğ, səhər durub çiməcöyük, sən öl. Sonra günorta yatıb, axşam yenə araqdan vuracooğ, sonra çiməcöyük, sən öl. Sonra da...

Bəs sonra, sonra nə olacaq sualımıza da konkret cavab verdi:

- Siz fikirləşdiyiniz baş tutmayacaq, çünki rus dilini bilmirəm, sən öl. Xalxın qızlarını özümə güldürməyəcəm ki... Qatara minib qayıdacağam evimə-eşiyimə, sən öl, özüm ölüm, lap elə siz özünüz də...скачать dle 10.5фильмы бесплатно

Müəllifin bütün yazıları - Akif CABBARLI



Bölməyə aid digər xəbərlər
{sape_links}{sape_article}