14:50 / 28-02-2024
Lavrov Türkiyəyə gedir
Araq da olacaq - Akif Abbasov yazır
Tarix: 03-12-2023 18:10 | Bölmə: Akif ABBASOV
Araq da olacaq

Akif ABBASOV

(hekayə)

Nizami müəllim kollec direktoru idi. Qəbul imtahanları yaxınlaşırdı. İmtahanlar Tələbə Qəbulu Komissiyası tərəfindən aparılır, sonda qəbul olunanların siyahısı kolleclərə göndərilirdi.

Yayın cirhacır vaxtı idi. Nizami müəllim kabinetində əyləşib sənədlərə baxır, bəzilərini imzalayıb möhürləyirdi. Otaq sərin idi. Kondisioner içərini isti havadan qoruyurdu. Bu ara telefon səsləndi. Nizami müəllim dəstəyi qaldırdı. Gözətçi idi:

- Nizami müəllim, burada bir nəfər ağsaqqal sizi görmək istəyir.

- Deyin başım qarışıqdır.

- Deyirik, nə billah eləyiriksə, əl çəkmir.

Nizami müəllim sənədləri bir kənara qoyub:

- Buraxın, gəlsin. - dedi.

70-75 yaşlarında bir kişi daxil oldu. İrəli yeriyib Nizami müəllimə əl verdi və özünü təqdim etdi:

- Qır Saqqızov.

Nizami müəllimin dodağı qaçdı. Öz-özünə: “Deyirəm axı. Heç bunun qabağında durmaq olar? Adından görünür”, - deyə fikirləşdi və kişiyə yer göstərdi:

- Eşidirəm.

- Mən barlı-bağatlı Çaxırlı kəndindənəm. Kəndçi babayam. Suçu işləyirəm. Özünüzə baxmayın, bu istidə sərin kabinetdə oturmusunuz. Bizim başımızı qaşımağa vaxtımız yoxdur. Uzun yolu qət eləyib gəlməyim səbəbsiz deyil. Nəvəm bu il orta məktəbi bitirib. Sizin kollecə girmək istəyir. Dedim, problem yoxdur. Nizami müəllimin canı sağ olsun. Onun əlində su içmək kimi bir işdir.

Kişi ərklə danışırdı. Sanki onunla 40-50 ilin dostu idi. Nizami müəllim isə onu birinci dəfə görürdü.

- Hə, uşağa bax beləcə də dedim. Dedim bir uşağı kollecə qəbul eləmək Nizami müəllimin əlində nədir ki?! Dövlət onu buraya direktor qoyub ki, zəhmətkeşlərin balalarını yola versin. Yola verməyib nə deyəcək ki? Hə, Nizami müəllim, deməli belə, bu uşağı - nəvəmi sizin kollecə qəbul edirsən. Bu, bir. Onu oxudursan. Bu, iki. Ona yataqxanada yer verirsən. Bu, üç. Aylıq təqaüd kəsirsən. Bu da dörd. Axırda da çağırıb diplomunu verirsən. Bu da, beş. Uşaq diplomunu alanda əmin gəlib sənə yaxşı bir qonaqlıq verəcək.

Nizami müəllimin mati-mutu qurumuşdu. Dayanıb baxırdı. Onun dinmədiyini görən kişi tez:

- Qonaqlıqda araq da olacaq, - deyə söz verdi. Sonra ayağa qalxıb, - Gedib uşağı gətirim, sənə təhvil verim. İş adamıyam. Sabah kənddə olmalıyam.

Kişi çıxmaq istəyəndə Nizami müəllim onu saxladı:

- Yoldaş Qır Saqqızov, dediklərinin heç biri mənlik deyil. Kolleclərə qəbulu Tələbə Qəbulu üzrə Dövlət Komissiyası aparır. Oxumağa qalanda tələbələrin yerinə mən oxumuram. Yataqxanaya gələndə, orada yerimiz yoxdur. Qaçqınlar yerləşdirilib. Diplomu da Təhsil Nazirliyi verir.

Qır Saqqızov dilxor oldu. Alnına soyuq tər gəldi:

- Bə mən sənə arxayın olub gəlmişdim. Bütün bu işlərə sənin dəxlin yoxdursa, bə səni burada niyə oturdublar?

Nizami müəllim zarafata saldı:

- Oturdublar da. Kabinet boş idi. Dedilər get, otur orada.

Qır Saqqızov suyu süzülə-süzülə kabinetdən çıxdı.



Müəllifin bütün yazıları - Akif ABBASOV



Bölməyə aid digər xəbərlər
18-02-2024, 10:15 Akif ABBASOV - Acığa iş - Hekayə
15-02-2024, 08:42 Akif ABBASOV - Sükan - Hekayə
6-02-2024, 16:25 Akif ABBASOV - Kəlbətin - Hekayə

{sape_links}{sape_article}