ABŞ postsovet məkanın Rusiyaya buraxmayacaq
Tarix: 29-07-2021 13:46 | Bölmə: Xəqani CƏFƏRLİ
ABŞ postsovet məkanın Rusiyaya buraxmayacaq

ABŞ prezidenti Co Bayden Belarus xalqının legitim təmsilçisi, son prezident seçkisinin qalibi Svetlana Tixanovskayanı Ağ evdə qəbul edib. Bu, ilk baxışıdan böyük siyasi hadisə sayılmaya bilər. Əslində isə siyasi təsirləri zamanla hiss olunacaq çox böyük hadisə baş verib.

Dünyada mövcud olan dövlətlərin rəsmi təmsilçiləri, kral, prezident və baş nazirlər Vaşinqtona dəvəti səbirsizliklə gözlədikləri bir vaxtda, Belarusdakı son prezident seçkisinin qalibinin Vaşinqtona dəvət edilməsi və ən yüksək səviyyədə qəbul olunması göstərir ki, Ağ ev hakimiyyətin başında duran şəxslə deyil, xalqı təmsil edən şəxslə işbirliyi tətbiq etməyə başlayıb.

Postsovet respublikaları üçün S. Tixanovskayanın Ağ evdə prezident C. Bayden tərəfindən qəbul edilməsinin xüsusi əhəmiyyəti var. Bu görüşdən əvvəl belə fikirlər mövcud idi ki, Cenevrə görüşündə Rusiyanın avtoritar lideri Vladimir Putin ABŞ prezidentindən postsovet məkanına müdaxilə etməməyi, bu bölgənin Moskvanın nəzarət dairəsi kimi qəbul olunmasını istəyib. Cenevrə görüşündən sonra yayılan qeyri-rəsmi məlumatlarda Baydenin Putinin bu tələbi ilə razılaşdığı iddia olunurdu. Hətta qeyd olunurdu ki, Putin ABŞ prezidentindən Tixanovskayanı Vaşinqtona dəvət etməməyi tələb edib və guya Bayden Rusiyanın avtoritar liderinin bu istəyi ilə razılaşıb. İndi isə məlum olur ki, Bayden Putinlə razılaşmayıb və postsovet məkanını Rusiyaya buraxmaq niyyətində deyil. Tixanovskayanın Vaşinqtonda ən yüksək səviyyədə qəbul olunması da bunun təsdiqidir.



C. Baydenin S. Tixanovskaya ilə görüşdə dünyada demokratiya ilə avtoritarizm arasında mübarizə getdiyini bəyan etməsi də demokratiya uğrunda mübarizə aparan bütün qüvvələrə yönəlik mesaj kimi qəbul oluna bilər. Tixanovskaya isə demokratiya ilə avtoritarizm arasında mübarizənin ön xəttinin Belarus olduğunu, 36 min insanın həbs və işgəncələrə məruz qalmasına baxmayaraq Belarus xalqının demokratiya uğrunda mübarizəni davam etdirdiyini bildirib.

Bu görüşdən sonra yayılan qeyri-rəsmi məlumata görə, Vaşinqton Belarus iqtisadiyyatının tamamilə çökməsinə səbəb olacaq yeni sanksiya paketi hazırlayır. Məqsəd Avropanın sonuncu diktatorunu bütün maliyyə mənbələrindən məhrum etməkdir.

Belə görünür ki, ABŞ Rusiyanı öz sərhədləri daxilinə çəkilməyə vadar etməkdə qərarlıdır.

Müəllifin bütün yazıları - Xəqani CƏFƏRLİ



Bölməyə aid digər xəbərlər
30-11-2016, 12:29 Xəqani CƏFƏRLİ - Yeni savaş

{sape_links}{sape_article}