“ABŞ Rusiya ilə sülh danışıqları zamanı Ukraynaya xəyanət edə bilər. Xüsusilə də Rusiya tərəfindən işğal olunmuş Ukrayna əraziləri məsələsində”.

Reyting.az-ın xəbərinə görə, Almaniyanın “Spiegel” nəşri Avropa liderlərinin iştirakı ilə keçirilmiş gizli telefon konfransından sızmış məlumatlara əsasən yazır ki, bu sözləri Fransa prezidenti Emmanuel Makron işlədib.

Qeyd olunur ki, ABŞ Ukraynanın müharibədən sonrakı təhlükəsizlik zəmanətləri ilə bağlı da ortaya aydın mövqe qoymayıb.

Nəşrin məlumatına görə, Almaniya kansleri Fridrix Merz və Fransa prezidenti Emmanuel Makron Ukrayna və Rusiya arasında aparılan sülh danışıqları məsələsində ABŞ-a qarşı dərin etimadsızlıq nümayiş etdirirlər.

Telefon danışığının qeydləri göstərir ki, Merz və Makron Ukrayna prezidenti Vladimir Zelenski və bir neçə digər yüksək vəzifəli Avropa siyasətçisi ilə söhbət zamanı ABŞ-ın Ukrayna və Avropaya xəyanət edə biləcəyi barədə xəbərdarlıq etmək üçün sərt ifadələr işlədiblər.

Makron bildirib ki, ABŞ təhlükəsizlik zəmanətlərini dəqiq müəyyənləşdirmədiyinə görə, ərazi məsələsində Ukraynaya xəyanət ehtimalı mövcuddur.

Fransa prezidentinin sözlərinə görə, Zelenskinin qarşısında “böyük təhlükə” dayanır.

“Spiegel” yazır ki, Rusiyanın ərazi güzəştləri tələbi danışıqların ən həssas və çətin məqamlarından biridir.

Merz isə Zelenskiyə yaxın günlərdə “çox ehtiyatlı” olmağı məsləhət görüb.

“Onlar eyni vaxtda həm sizinlə, həm də bizimlə oyun oynayırlar”, - deyə Almaniya kansleri bildirib. Onun bu fikri ilə, yəqin ki, ABŞ-ın Kremldə Vladimir Putinlə görüşən iki nümayəndəsi - tikinti maqnatı Stiv Uitkoff və ABŞ prezidenti Donald Trampın kürəkəni Cerad Kuşner nəzərdə tutulub.

“Spiegel” yazır ki, bu hal Avropa liderlərinin Trampın iki etibarlı nümayəndəsinə qarşı duyduğu dərin etimadsızlığı əks etdirir.

Məlum olur ki, Tramp ilə yaxşı münasibətləri olan azsaylı Avropa liderlərindən biri - Finlandiya prezidenti Aleksandr Stubb da ABŞ prezidentinin iki nümayəndəsi barədə ehtiyatlı davranmaq lazım olduğunu bildirib.

“Biz Ukraynanı və Vladimiri (Zelenski nəzərdə tutulur-red.) bu şəxslərlə tək buraxmamalıyıq”,- deyə Stubb vurğulayıb.

Bu fikri NATO-nun baş katibi Mark Rütte də dəstəkləyib: “Aleksandrla razıyam, biz Vladimiri qorumağa borcluyuq”.

Qeyd edilir ki, Avropa liderlərinin telefon konfransı dekabrın 1-də olub.

Xatırladaq ki, Trampın xüsusi nümayəndəsi Uitkoff və Kuşner dekabrın 2-də Moskvada Rusiya prezidenti ilə beş saatlıq danışıqlar aparıblar. Bəzi məlumatlara görə, həmin görüşdən sonra amerikalı nümayəndələr Brüsselə - guya Zelenski ilə görüşməyə yollanmalı olsalar da, görüş sonradan ləğv edilib.

Bununla yanaşı, Moskvada Putinlə danışıqlar əhəmiyyətli nəticə verməyib.

Y. QACAR