ABŞ prezidenti Donald Tramp Ukraynada davam edən münaqişənin III Dünya Müharibəsinə çevrilə biləcəyini deyib.

Reyting.az xəbər verir ki, ABŞ lideri bunu Ağ evdə jurnalistlərlə görüşü zamanı bildirib.

Onun sözlərinə görə, bu münaqişənin dayandırılmasını çox istəyir və buna səy göstərir.

Tramp həmçinin bildirib ki, ABŞ artıq Rusiya və Ukrayna ilə razılığa gəlməyə yaxındır.

Xatırladaq ki, Vaşinqton noyabr ayında 28 maddəlik sülh planını təklif etdikdən sonra Ukrayna ilə bağlı danışıqlar intensivləşib. Kiyev və Avropadakı tərəfdaşları isə sənəddən narazılıqlarını bildirib və onu əhəmiyyətli dərəcədə dəyişdirməyə çalışıblar.

Tramp daha sonra deyib ki, orijinal plan Moskva və Kiyevin mövqelərini nəzərə almaq üçün yenidən işlənib, yalnız bir neçə mübahisəli məsələ qalıb.

Onu da qeyd edək ki, Amerika nümayəndələri Floridada Ukrayna nümayəndə heyəti ilə, Moskvada isə Rusiya tərəfi ilə danışıqlar aparıblar.

Dekabrın 8-də Ukrayna prezidenti Vladimir Zelenski Avropa liderləri ilə görüşü zamanı hazırlanmış 20 maddəlik sülh planını ABŞ-a təqdim edəcəyinə söz verib.

E. KAMAL