Donald Tramp administrasiyası Çinin kritik minerallar sahəsində dominantlığına, süni intellekt və digər texnologiyalarda sürətli inkişafına qarşı beynəlxalq koalisiya yaratmağa hazırlaşır.

Reyting.az xəbər verir ki, bu barədə “Politico” nəşri məlumat yayıb.

Məlumata görə, administrasiya cümə günü Sinqapur, Avstraliya, Yaponiya, Cənubi Koreya və İsraili bir araya gətirən Pax Silica Bəyannaməsinin imzalanmasını planlaşdırır. Bu təşəbbüsün məqsədi Çinin kritik minerallar və texnologiya sektoruna böyük investisiyaları nəticəsində yaranmış boşluğu aradan qaldırmaqdır.

Administrasiya əlavə ölkələri də qrupun tərkibinə cəlb etməyə çalışır.

Bu qərar ABŞ prezidenti Donald Tramp komandasının, Çinin mülki və hərbi tətbiqlər üçün zəruri olan minerallar bazarında demək olar ki, inhisarçı mövqeyinə ciddi təhlükə kimi yanaşdığını nümayiş etdirir.

Qeyd olunur ki, Pekin Tramp administrasiyasının Çin məhsullarına qarşı aqressiv tarif siyasətinə cavab olaraq ixrac məhdudiyyətləri tətbiq etməklə bu sahədəki üstünlüyündən istifadə edir.

Bu addım həmçinin ABŞ-nın Çinin süni intellekt və kvant hesablamalarına böyük həcmdə investisiyalarını diqqətlə izlədiyini göstərir. Bu sahələrdə Çin üstünlük əldə edərsə, 21-ci əsr iqtisadiyyatında qlobal rəqabət gücünü artırmış olacaq.

“Bu, iqtisadi təhlükəsizlik koalisiyası üçün sənaye siyasətidir və oyun dəyişdiricisidir. Çünki bu gün süni intellekt iqtisadiyyatını və bu sahədə Çinlə necə rəqabət apara biləcəyimizi müzakirə etmək üçün vahid platforma mövcud deyil. İqtisadi təhlükəsizliyə yanaşmalarımızı uyğunlaşdırmaqla, Çin limanlarını, əsas magistral yolları, nəqliyyat və logistika dəhlizlərini ələ keçirmək imkanından məhrum edilə bilər və beləliklə, Çinin ixrac yönümlü modelini gücləndirməyə hesablanmış “Bir Kəmər-Bir Yol” təşəbbüsünü effektiv şəkildə bloklamaq mümkün olar”,- ABŞ dövlət katibinin İqtisadi Artım, Enerji və Ətraf Mühit üzrə müavini Ceykob Helberq bildirib.

Onun sözlərinə görə, Tramp administrasiyası bəyannaməni imzalayan beş ölkədən ibarət koalisiyanı mineral, texnoloji və istehsal sahələrində potensiala malik daha çox müttəfiqlə genişləndirməyi planlaşdırır.

Bəyannamənin imzalanması bir günlük Pax Silica sammiti ilə müşayiət olunacaq. Sammitdə Avropa Birliyi, Kanada, Hollandiya və Birləşmiş Ərəb Əmirliklərinin nümayəndələri də iştirak edəcəklər. Zirvə toplantısında qabaqcıl istehsal, mineral emalı və logistika kimi sahələrdə əməkdaşlıq məsələləri müzakirə olunacaq.

Y. QACAR