Avropa Şurası Parlament Assambleyası (AŞPA) yanında yaradılan platformada iştirak üçün Rusiya demokratik qüvvələrinin təmsilçisi olan ən azı 50 siyasətçi müraciət edib.

Reyting.az xarici KİV-ə istinadla xəbər verir ki, müraciət edənlər arasında Mixail Xodorkovski, Yekaterina Şulman, Yevgeniya Çirikova, Marat Qelman, Harri Kasparovla bərabər Vladimir Kara-Murza, İvan Jdanov və Lyubov Sobol da var.

Real namizədlərin sayı daha çox ola bilər. Çünki hələlik bütün siyasətçilərin müraciəti açıq şəkildə elan edilməyib.

Platformanın yekun tərkibini AŞPA Bürosu müəyyənləşdirəcək. Bu qurum Rusiya demokratik qüvvələri ilə dialoqa başlamaq barədə qətnaməni 2025-ci ilin oktyabrında qəbul etsə də, ümumi dialoqun formatı indiyədək açıqlanmayıb.

Bununla belə, bu proses fonunda Rusiya müxalifətində parçalanma yaranıb. Putin rejiminə qarşı mübarizə aparan bir qrup rusiyalı müxalifətçinin təşəbbüsü ilə yaradılmış "Korrupsiyaya Qarşı Mübarizə Fondu" platformada iştirakdan imtina edib. Onların iddiasına görə, AŞPA platformasına qatılacağı gözlənilən, Rusiyanı təmsil edən müxalifyönümlü iştirakçıların bu cür qapalı prosedurla seçilməsi "demokratik prinsiplərə zidd" addımdır.

Fondun təmsilçiləri bəyan ediblər ki, onlar Putin Rusiyasına qarşı mübarizəni indən sonra da qətiyyətlə davam etdirmək əzmindədirlər, lakin Antimüharibə Komitəsi tərəfindən hazırlanmış Berlin Bəyannaməsi siyasi baxışları ilə uyğunsuzluq yaratdığına görə, bu sənədi imzalamaqdan qəti şəkildə imtina edirlər.

"Korrupsiyaya Qarşı Mübarizə Fondu"ndan bildiriblər ki, Berlin Bəyannaməsi siyasi bir sənəd kimi "manipulyasiya aləti"dir.

Oqtay QORÇU