Sürətlə inkişaf edən süni intellekt nəticəsində üç il ərzində elmi tədqiqatlar indiki formasını tam itirəcək. Təxminən on ildən sonra isə nəzəri fizika demək olar ki, insan fəaliyyəti kimi sona çatacaq.

Reyting.az xəbər verir ki, bunu nəzəri fizika və elm populyarizatoru üzrə ixtisaslaşmış alim Sabina Hossenfelder müasir dünya elmi ilə bağlı danışarkən deyib.

Elm adamının iddiasına görə, yaxın zamanlarda laboratoriyaları, tələbələri, postdokları daha ucuz və sürətli süni intellekt agentləri əvəz edəcək.

Araşdırmalar göstərir ki, insanların 53 faizi artıq süni intellektdən tamamilə sərbəst şəkildə istifadə edir, elmlə məşğul olan və gənc nəsli təmsil edən alimlər arasında isə bu göstərici 87 faizdir. Hətta ABŞ-da fəaliyyət göstərən nüfuzlu Massaçusets Texnologiya İnstitutu və Oksford Universiteti bir müddətdir ki, əməkdaşlarına, tələbələrə "ChatGPT"-nin korporativ versiyalarını təqdim ediblər.

Sabina Hossenfelder 

Fizik kimi dəqiq faktlara istinad edən Sabina Hossenfelder xatırladıb ki, bir müddət əvvəl "Science" jurnalında Kornell Universiteti tədqiqatçılarının müəllifliyi ilə dərc olunmuş araşdırmalara əsasən, süni intellekt amerikalı alimlərin məhsuldarlığını 30-50 faiz, digər dünya ölkələrində 50-90 faiz artırıb.

Fizik həmçinin vurğulayıb ki, ABŞ-da 2025-ci ildə işə salınmış "Genesis" proqramı da elmi kəşflərin süni intellekt ilə sürətləndirilməsini hədəfləyir.

S. Hossenfelder risklərə də diqqət çəkib. Alim deyib ki, məqalələrin sayı daha da artacaq, eyni zamanda elmi əsərləri qiymətləndirəcək mütəxəssislər çatışmayacaq. Əks təqdirdə bunların fonunda bərabərsizlik dərinləşə bilər.

Oqtay QORÇU