Z nəsli artıq qlobal iqtisadiyyatda əsas gücə çevrilir. “Bank of America” tərəfindən təsis edilən “BofA Global Research” araşdırma qrupunun məlumatına görə, növbəti 5 il ərzində Z nəslinin ümumi qlobal gəliri təxminən 36 trilyon dollara çatacaq.

Reyting.az xəbər verir ki, mütəxəssislərin proqnozlarına əsasən, 2040-cı ilədək bu göstərici 74 trilyon dollara yüksələcək. Qeyd edək ki, 2023-cü ildə Z nəslinin ümumi gəliri cəmi 9 trilyon dollar təşkil edib.

Araşdırmada bildirilir ki, 1997–2012-ci illər arasında doğulan Z nəslinin həm zəruri, həm də qeyri-zəruri xərcləri ümumi əhali ilə müqayisədə daha sürətlə artır. Eyni zamanda onların xərcləri yığımlarını təxminən iki dəfə üstələyir. Bu hal əsasən həyat xərclərinin bahalaşması ilə izah olunur.

Tədqiqatçılar vurğulayırlar ki, ABŞ və digər ölkələrdə əmək bazarında çətinliklər getdikcə artır. Bu isə yeni nəsil üçün həm ciddi problem, həm də həllini tələb edən çağırış kimi qiymətləndirilir.

Araşdırmalara görə, Z nəslinə aid ailələr arasında işsizlik müavinəti alanların sayı 2025-ci ilin fevral ayında hazırlanmış geniş hesabat və illik statistika ilə müqayisədə təxminən 32 faiz artıb. Eyni zamanda əmək bazarına yeni daxil olanlar arasında işsizlik səviyyəsinin də yüksəldiyi qeyd olunur.

“Bank of America” tədqiqatçılarının yekun təhlilinə əsasən, növbəti 10 il ərzində Z nəsli həm say baxımından (təxminən 30 faiz), həm də gəlir səviyyəsinə görə qlobal iqtisadiyyata güclü təsir göstərəcək.

Oqtay QORÇU