ABŞ-nın Marsdan nümunələrin Yerə gətirilməsi missiyasından imtina etməsi Çinin bu sahədə birinci olmaq ehtimalını xeyli artırır.

Reyting.az-ın məlumatına görə, ABŞ Konqresinin NASA-nın gələcək büdcəsini azaltmaqla bağlı qərarı Marsdan nümunələrin Yerə qaytarılmasını nəzərdə tutan “Mars Sample Return” proqramının faktiki olaraq dayandırılması ilə nəticələnib. Məhz bu qərar nəticəsində büdcəsi 11 milyard dollara çatan və eyni zamanda yüksək texnoloji risklər daşıyan layihə ixtisar edilib.

“ScienceAlert” nəşrinin yazdığına görə, bəzi analitiklər hesab edirlər ki, ABŞ Konqresinin bu qərarı Mars uğrunda uzun müddətdir davam edən yarışda ABŞ-nın Çinə uduzmasına gətirib çıxara bilər.

Çin 2028-ci ildə Marsa robot platforma göndərməyi, 2030-cu illərin əvvəlində isə Qırmızı planetdən götürüləcək ilk nümunələri Yerə çatdırmağı planlaşdırır. Nümunələrin yalnız eniş nöqtəsindən götürüləcəyi və bununla bağlı məlumatların məhdudlaşdırılacağı bildirilsə də, bu addım çox böyük elmi nailiyyət hesab olunur.

Eyni zamanda, kommersiya şirkətlərinin, o cümlədən “Lockheed Martin”in daha ucuz alternativlərlə, təxminən 3 milyard dollar həcmində investisiya yatıraraq Marsdan nümunələrin gətirilməsi üçün uçuş həyata keçirə biləcəyi ilə bağlı ehtimallar da mövcuddur.

Oqtay QORÇU