Fevralın 4-də Azərbaycan və Ermənistan liderləri İlham Əliyevlə Nikol Paşinyan Əbu-Dabidə görüşüblər. Bu görüş iki ölkə arasında etimadı möhkəmləndirmək və birbaşa dialoqu davam etdirmək baxımından mühüm addımdır. Belə görüşlərlə davamlı sülhün əsası qoyula, bölgədə inteqrasiyaya və iqtisadi inkişafa imkanlar yarana bilər.

Demokratik İslahatlar Partiyasının (DİP) sədri, deputat Asim Mollazadə Əbu-Dabidə baş tutan görüşü “Reytinq” qəzetinə şərh edərkən deyib ki, Azərbaycan 44 günlük müharibədən sonra bölgədə sülh təşəbbüsü irəli sürüb.

Onun sözlərinə görə, Azərbaycanın istəyi və təklifi ilə regionda həyata keçirilən sülh prosesi davam edir.

Asim Mollazadə

A. Mollazadə bildirib ki, Azərbaycan dövləti sülh üçün çalışır:

“Sülh prosesinin davamlı olması və baş tutması üçün Ermənistan dövləti də ondan asılı olanı etməlidir. Bu halda davamlı sülhdən danışa bilərik. Azərbaycan dövləti sülh üçün vacib addımları atıb və atmaqdadır. Ermənistan da bu yolla getməlidir”.

DİP sədri əmindir ki, bölgəmizdə sülh yaranacaq və bu, firavanlığa səbəb olacaq. Eyni zamanda regionda iqtisadiyyat və ticarət imkanları genişlənəcək.

A. Mollazadə sonda əlavə edib ki, Azərbaycan güclü dövlətdir və sülhyaratma prosesinə mane olmaq istəyən qüvvələrin qarşısını almağı bacaracaq.

Nemət ORUCOV

Reyting.az