2,7 ton kokain müsadirə olunub

Avstraliya polisi Sidney yaxınlığında həyata keçirilən ölkə tarixinin ən böyük narkotik əməliyyatı zamanı yeraltı bunkerlərdə gizlədilmiş təxminən 2,7 ton kokain müsadirə edib.

Reyting.az xəbər verir ki, əməliyyat çərçivəsində yeraltı bunkerlərdə saxlanılan böyük həcmdə narkotik vasitə aşkarlanaraq götürülüb.

Polis hadisə yerindən qaçmağa cəhd göstərən 21 və 25 yaşlı iki şübhəlini saxlayıb. Hər iki şəxs “külli miqdarda qanunsuz idxal olunmuş narkotik vasitə saxlama” maddəsi ilə ittiham olunur. Bu cinayətə görə ömürlük həbs cəzası nəzərdə tutulur.

Bildirilib ki, kokain yük konteynerlərində yaradılmış gizli bölmələrdə yerləşdirilən plastik qabların içərisində gizlədilib.

Əməliyyatla bağlı açıqlamada qeyd olunub ki, təxminən 572,3 milyon dollar dəyərində olan kokain üç yük konteynerindəki xüsusi gizli bölmələrdə aşkar edilib.

Müsadirə edilən narkotik vasitələrin Sidneyin qərbində yerləşən yarıkənd təsərrüfatı ərazisindəki bir mülkdə tapıldığı bildirilib. Həmin mülkün narkotik vasitələrin idxalında iştirak etdiyi iddia olunan mütəşəkkil cinayətkar qrupla əlaqəli olduğu qeyd edilib.

Polisin məlumatına görə, kokain ölkəyə Kvinslend ştatındakı Mic Point yaxınlığından qaçaqmalçılıq yolu ilə gətirilib, daha sonra isə mütəşəkkil cinayətkar qrup tərəfindən Sidneyə daşınıb. Hazırda istintaq davam edir.

Qeyd olunub ki, bu iş üzrə daha əvvəl 178 kiloqram kokain və 142 kiloqram metamfetamin də müsadirə edilmişdi. Son əməliyyatdan sonra istintaq çərçivəsində götürülən narkotik vasitələrin ümumi həcmi 3 tonu ötüb.

V. Quliyev
 

• Teqlər
• #Əməliyyat
• #2
• #7 ton kokain müsadirə olunub