Bunker-büdrədici raketi sınaqdan uğurla keçib

Cənubi Koreya dərin möhkəmləndirilmiş yeraltı hədəfləri vurmaq üçün hazırlanmış yeni “Çonqryon” (Səmavi Əjdaha) uzunmənzilli kruiz raketinin ilk texniki uçuş sınağını uğurla keçirib. 

Reyting.az xəbər verir ki, bu, iki uğursuz cəhddən sonra ilk uğurlu sınaqdır və bu müddət ərzində tərtibatçılar prototipləri uzaqdan məhv etməli olublar.

Sınaq 3-cü Döyüş Təlimi Qanadında baş tutub. Raket “FA-50” yüngül hücum təyyarəsindən uğurla ayrılıb, mühərrikini havada alovlandırıb və sabit uçuşunu davam etdirib. Bunlar yanvar və mart aylarında buraxılışlar zamanı əldə edilməyən mərhələlər olub. 

Proqram planlaşdırıldığı kimi davam edərsə, inkişaf 2028-ci ilə qədər başa çatacaq, seriyalı istehsal 2029-cu ildə başlayacaq və raket 2030-cu illərin əvvəllərində istifadəyə veriləcək. Əsas buraxılış vasitəsi ən yeni Cənubi Koreya qırıcısı “KF-21” Boramae olacaq, lakin “Səmavi Əjdaha” “FA-50”, “KF-16” və “F-15K” təyyarələri ilə inteqrasiya olunacaq.

Yeni silah, Şimali Koreyanın bir çoxu dağ silsilələrində yerləşən geniş yeraltı bunkerlər və komanda məntəqələri şəbəkəsinə cavab olaraq hazırlanır. Raket, ənənəvi hava bombaları üçün faktiki olaraq əlçatmaz olan möhkəmləndirilmiş hədəfləri dəqiq məhv etmək üçün nəzərdə tutulub.

Cənubi Koreya mediasının məlumatına görə, “Çonqryon”un mənzili 600 kilometri keçəcək ki, bu da hazırda xidmətdə olan Almaniyanın Taurus “KEPD 350” raketinin mənzilindən təxminən 20 faiz çoxdur. 

Yeni raket nüfuzetmə qabiliyyətinin təxminən 90 faizini saxlayacaq, lakin çoxqatlı yeraltı beton konstruksiyaları məhv etmək üçün daha təsirli döyüş başlığına malik olacaq.

V. Quliyev
 

• Teqlər
• #Koreya
• #Bunker-büdrədici raketi sınaqdan uğurla keçib