Dünyanın ən bahalı evi: 27 mərtəbəli göydələndə cəmi 5 nəfər yaşayır

Hindistanın Mumbay şəhərində yerləşən Antilia dünyanın ən bahalı özəl yaşayış binalarından biri hesab olunur. Təxminən 175 metr hündürlüyündə olan bu möhtəşəm bina otel, ofis və ya ictimai obyekt deyil, bir ailənin yaşadığı fərdi iqamətgahdır. Ölçüsü, memarlıq həlli və texnoloji imkanları ilə Antilia daha çox şaquli şəhəri xatırladır.

Reyting.az xəbər verir ki, bina Mumbayın ən bahalı küçələrindən biri sayılan Altamont Road-da yerləşir. Bu küçə tez-tez Nyu-Yorkun məşhur “Milyarderlər Xiyabanı” ilə müqayisə olunur.

Layihənin memarlıq dizaynı Çikaqoda yerləşən “Perkins & Will” şirkəti tərəfindən hazırlanıb. Tikintidə isə bir sıra beynəlxalq şirkətlər iştirak edib. Təxminən 2010-cu ildə istifadəyə verilən bina dərhal dünya mediasının diqqətini cəlb edib. Müxtəlif qiymətləndirmələrə görə, Antilianın dəyəri 1-2 milyard dollar arasında dəyişir.

Binanı xüsusi edən yalnız ölçüsü deyil. Antilia seysmik cəhətdən fəal zonada yerləşən Hindistan üçün mühüm tələb hesab olunan 8 bal gücündə zəlzələyə davam gətirəcək şəkildə inşa edilib.

Bu möhtəşəm bina Hindistanın ən böyük özəl şirkətlərindən biri olan “Reliance Industries”in rəhbəri Mukeş Ambani və ailəsinə məxsusdur. Şirkət enerji, neft-kimya, telekommunikasiya və pərakəndə satış kimi müxtəlif sahələrdə fəaliyyət göstərir.

Mukeş Ambani dünyanın ən zəngin iş adamlarından biri hesab olunur. Onun həyat yoldaşı Nita Ambani isə təhsil, səhiyyə və sosial layihələri dəstəkləyən Reliance Fonduna rəhbərlik edir. Cütlüyün üç övladı var və ailə birlikdə Antiliyada yaşayır.

Təxminən 37 min kvadratmetr sahəni əhatə edən bina 27 mərtəbədən ibarətdir. Aşağı hissədə 168 avtomobil üçün nəzərdə tutulmuş altı mərtəbəli dayanacaq yerləşir. Burada avtomobillərin texniki xidməti üçün xüsusi servis sahəsi də fəaliyyət göstərir.

Binada ailə üzvlərinin istifadəsi üçün çoxsaylı eksklüziv imkanlar yaradılıb. Buraya 50 nəfərlik şəxsi kinoteatr, bir neçə vertolyot meydançası, məbəd, spa və gözəllik mərkəzi, qonaq apartamentləri, asma bağlar, istirahət və qəbul zalları daxildir.

Ən maraqlı xüsusiyyətlərdən biri isə süni qar yaradan xüsusi “qar otağı”dır. Mumbayın isti və rütubətli iqlimi nəzərə alındıqda, bu otaq binanın ən qeyri-adi məkanlarından biri hesab olunur.

Maraqlıdır ki, bu nəhəng binada cəmi beş ailə üzvü yaşasa da, onun fasiləsiz fəaliyyəti üçün yüzlərlə işçi çalışır. Müxtəlif məlumatlara görə, Antiliada 500-600 nəfərdən ibarət xidmət heyəti fəaliyyət göstərir. Onlar binanın təhlükəsizliyini, texniki sistemlərini, təmizliyini və gündəlik idarəçiliyini təmin edirlər.

N. Orucov
 

• Teqlər
• #Dünyanın ən bahalı evi
• #27 mərtəbəli göydələndə cəmi 5 nəfər yaşayır