Əminə Ərdoğan NATO sammiti çərçivəsində liderlərin xanımlarını qəbul edəcək

Türkiyə Prezidenti Rəcəb Tayyib Ərdoğanın xanımı Əminə Ərdoğan NATO Zirvəsi çərçivəsində yüksək səviyyəli qonaqları Çankaya Köşkündə qəbul edəcək.

Reyting.az xəbər verir ki, bu barədə Türkiyə mətbuatı məlumat yayıb.

Məlumata görə, iyulun 8-də Ankarada keçiriləcək NATO Dövlət və Hökumət Başçıları Zirvəsi çərçivəsində 20-dən çox dövlət və hökumət başçısının xanımı Çankaya Köşkünə dəvət olunacaq.

Bildirilir ki, Türkiyənin birinci xanımı Əminə Ərdoğan qonaqları şəxsən qarşılayacaq və onlarla birlikdə “Uşaqlar, Texnologiya və Təhlükəsizlik: Gələcək Nəsli Qorumaq” mövzusunda dəyirmi masa keçirəcək.

Görüşün əsas məqsədi uşaqların rəqəmsal mühitdə qarşılaşa biləcəyi risklərə qarşı beynəlxalq əməkdaşlığın gücləndirilməsidir. İştirakçıların rəqəmsal savadlılıq, etik yanaşmalar və uşaq hüquqlarının qorunması kimi mövzuları müzakirə edəcəyi bildirilir.

Tədbirdən sonra Əminə Ərdoğan qonaqlar üçün xüsusi nahar ziyafəti təşkil edəcək. Türk mətbəxinin nümunələrinin təqdim olunacağı tədbirdə həmçinin ənənəvi sənətkarlıq və mədəni irsi əks etdirən əl işlərindən ibarət sərginin də nümayiş olunacağı qeyd edilir.

V. Quliyev
 

• Teqlər
• #Ankara
• #Əminə Ərdoğan NATO sammiti çərçivəsində liderlərin xanımlarını qəbul edəcək