Robot müəssisəyə yarım milyon dollar qazandırıb

İsveçrədə 150 ildən artıq fəaliyyət göstərən "Vigier Ciment" sement zavodunda istifadə olunan dördayaqlı "ANYmal" robotu 2025-ci ilin əvvəlindən bəri avadanlıqlardakı nasazlıqları vaxtında aşkarlamaqla müəssisəyə 500 min dollardan çox qənaət etməyə kömək edib.

Reyting.az xəbər verir ki, çəkisi 50 kiloqram olan müasir robot kamera, termal kamera, qaz sensoru və akustik vizuallaşdırma sistemi ilə təchiz olunub. "Nəzarətçi" robot gündəlik marşrutu üzrə 450-dən çox əsas yoxlama nöqtəsini izləyərək həddindən artıq qızma, qaz sızması və konstruksiya qüsurlarını operativ şəkildə müəyyən edir.

Mütəxəssislərin sözlərinə görə, "ANYmal" robotunun indiyədək aşkarladığı ən ciddi nasazlıq daşqıran avadanlığının çatlamış bünövrəsi olub. Vaxtında aşkar edilən bu problem aradan qaldırılmasaydı, zavodun fəaliyyəti ən azı bir həftə dayanacaq, müəssisə isə təxminən 630 min dollar zərərə məruz qalacaqdı.

Robot bununla yanaşı, 140 dərəcə selsiyə qədər qızmış texniki yastığı, yüksək ammonyak konsentrasiyasını və 50 metr yüksəklikdə yaranmış hava sızmasını da müəyyən edib.

Qədim tarixə malik "Vigier Ciment" zavodunun nümayəndələri bildiriblər ki, "ANYmal" texniki xidmət briqadaları ilə birgə çalışır. Robot təmir işlərinin prioritetlərinin müəyyənləşdirilməsinə kömək etməklə yanaşı, işçilərin təhlükəli ərazilərə daxil olma ehtiyacını azaltdığı üçün onların təhlükəsizliyinin təmin edilməsində də mühüm rol oynayır.

Oqtay Qorçu
 

• Teqlər
• #"Vigier Ciment"
• #Robot müəssisəyə yarım milyon dollar qazandırıb