Rusiya yanacaqdoldurma məntəqələrində təlaş yaranıb

Rusiyada pərakəndə benzin qiymətləri bir həftə ərzində 3 faiz artıb. Bu, son iyirmi ilin ən böyük həftəlik qiymət sıçrayışı hesab olunur.

Reyting.az xəbər verir ki, “Bloomberg” bu artımı Ukrayna dronlarının hücumları nəticəsində zədələnən neft emalı zavodları ilə əlaqələndirib.

Federal Statistika Xidmətinin məlumatına görə, Rusiyada benzinin orta pərakəndə satış qiyməti 16-22 iyun tarixləri arasında 3 faiz artaraq hər litr üçün 71,20 rubla (0,95 dollar) çatıb.

Məlumata əsasən, qiymət artımı Ukraynanın dron hücumları nəticəsində neft emalı zavodlarına dəyən ciddi ziyanla bağlıdır. Zədələnmiş müəssisələr arasında Moskvadakı “Qazpromneft” neft emalı zavodu da var. Bu vəziyyət panik alışlara, yanacaqdoldurma məntəqələrində uzun növbələrin yaranmasına və bir sıra bölgələrdə yanacaq çatışmazlığına səbəb olub. Nəticədə hakimiyyət orqanları benzin satışına müəyyən məhdudiyyətlər tətbiq edib və vətəndaşları ehtiyacdan artıq yanacaq ehtiyatı toplamamağa çağırıblar.

Statistika xidmətinin məlumatına görə, dizel yanacağının qiymət artımı da sürətlənib. Əvvəlki həftədə 0,8 faiz olan artım tempi son həftədə 2,7 faizə yüksəlib.

“Ukraynanın Rusiya enerji infrastrukturuna qarşı həyata keçirdiyi dron kampaniyası Moskva üçün getdikcə daha ciddi makroiqtisadi problemə çevrilir”, – deyə “Capital Economics”in baş iqtisadçısı Liam Piç bildirib.

“Rosstat”ın məlumatına görə, neft məhsulları istehsalı aprel ayında 9,1 faiz azaldıqdan sonra may ayında daha 13,5 faiz geriləyib. Bu, ən azı 2015-ci ildən bəri qeydə alınan ən dərin azalma hesab olunur. Təkcə may ayının ilk yarısında neft məhsulları istehsalı ötən ilin eyni dövrü ilə müqayisədə 15 faiz, əvvəlki ayla müqayisədə isə 9 faiz azalıb.

Hazırda Rusiyanın təxminən 75 faiz regionunda müxtəlif növ məhdudiyyətlər tətbiq olunub və ya yanacaq tədarükündə fasilələr müşahidə edilir. Bryansk, Kursk, Lipetsk, Samara və Tümen vilayətlərində sürücülər üçün müəyyən məhdudiyyətlər tətbiq edilib.

Baş nazirin müavini Aleksandr Novak yay mövsümünün qızğın dövründə yanacaq tədarükünün artırılması istiqamətində görülən tədbirlər barədə Rusiya Prezidenti Vladimir Putinə məlumat verib.

“Bloomberg”in hesablamalarına görə, Ukrayna dronları 2026-cı ilin əvvəlindən etibarən Rusiyanın neft emalı zavodlarına ən azı 47 hücum həyata keçirib. 2025-ci ildə isə bu göstərici 82 olub.

V. Quliyev
 

• Teqlər
• #Qiymət artımı
• #Rusiya yanacaqdoldurma məntəqələrində təlaş yaranıb