Söz rəssamı Ramiz Qusarçaylı 

Ramiz Qusarçaylı çağdaş Azərbaycan poeziyasının ən parlaq nümayəndələrindən biridir. O, torpaq, yurd qoxulu, vətənpərvərlik ruhlu şeirlərində söz rəssamı kimi milli hislərin poetik tablosunu yaradıb. İstedadlı sənətkarın 18 il bundan əvvəl, yəni Zəfərimizdən 12 il öncə qələmə aldığı, o taylı–bu taylı azərbaycanlıların bütöv Vətən istəyinin vəsf edildiyi “Azərbaycan bayrağı” şeiri orta və ali məktəb dərsliklərinə salınıb. 

Azərbaycan bayrağı

Şənini vəsf etməyə yetər, qüdrətim yetər,
Ulduzunu, ayını göydə mələklər öpər,
Hər rəngində “ya qazi, ya şəhid” bir mən bitər,
Sən ey İstiqlalımın əbədiyyət sancağı, –
Azərbaycan bayrağı!

Yağının min hiyləsi küydən, kələkdən keçər,
Sən sancılan ucalıq min-min ürəkdən keçər,
Dağlar yerindən oynar, daşlar ələkdən keçər,
Göylərin nur yağmuru, yerlərin göy qurşağı, –
Azərbaycan bayrağı!

Sən Arazın, Samurun umuduna bələndin,
Çəni ağlar Göyçənin buluduna bələndin,
Dərbəndin dərd hıçqıran sükutuna bələndin
O tayımda Savalan, bu tayımda Şah dağı,
- Azərbaycan bayrağı!

Cəngidə cövlan yerim, cövlanda can yerimsən,
Barışda gül çələngim, savaşda qan yerimsən,
Sən mənim and yerimsən, mənim iman yerimsən,
Dalğalı ləngərlərin yelpiklənən yarpağı, –
Azərbaycan bayrağı!

Sənsən Azadlıq eşqim, sənsən Hürr, – deyəcəyəm,
Ən son nəfəsimdə də sənə şeir deyəcəyəm,
Şuşada sən qonduğun daşa pir deyəcəyəm,
Çəkəcəyəm gözümə kölgən düşən torpağı
Azərbaycan bayrağı!
Azərbaycan bayrağı!

• Teqlər
• #Ramiz Qusarçaylı