Fotoqrafiya sənətində dünyanın ən məşhur ustadlarından biri hesab olunan britaniyalı fotoqraf Martin Parr 73 yaşında vəfat edib. Bu barədə ilk dəfə fotoqrafın təsis etdiyi "Martin Parr Foundation" fondunun rəsmi saytında məlumat verilib. 

Reyting.az ingilis nəşrlərinə istinadla bildirir ki, Martin Parr dekabrın 6-da axşamçağı Bristoldakı evində dünyasını dəyişib.

Qeyd olunur ki, Perrin ailə üzvləri - həyat yoldaşı Syuzi, qızı Ellen, bacısı Vivyen və nəvəsi Corc "Martin Parr Foundation", həmçinin "Magnum Photos" irsinin qorunması üzərində birgə işləməyə davam edəcəklər.

1952-ci ildə Böyük Britaniya Krallığının bir hissəsi olan Surrey qraflığında doğulmuş Martin Parr dünyanın ən tanınmış sənədli fotoqraflarından biri sayılırdı. O, 100-dən çox fotokitabın müəllifidir, 1994-cü ildən "Magnum Photos" fotoqraflar təşkilatının üzvü, 2013–2017-ci illərdə isə adıçəkilən agentliyin prezidenti olub. Onun əsərləri Tate və Pompidu kimi aparıcı muzeylərdə sərgilənir.

Martin Parr ilk dəfə SSRİ-də "McDonald’s" kafesinin açılışını lentə alan fotoqrafdır. Məşhur fotoqraf dəfələrlə dəvət alsa belə, sonralar Rusiyaya gəlməyib. 2025-ci ildə Martin Parr bir müsahibəsində heç zaman Rusiyaya qayıtmayacağını söyləmiş, eləcə də Rusiya prezidenti Vladimir Putini "psix" adlandırmışdı.

Oqtay QORÇU