ABŞ-da surroqat analıq yolu ilə 100-dən çox uşaq atası olduğu iddia edilən Çinli oyun milyarderi Xu Bo uşaqlarının bir gün İlon Maskın uşaqları ilə evlənəcəyini xəyal edir.

Reyting.az xəbər verir ki, “Wall Street Journal” tərəfindən təsdiqlənmiş sosial media paylaşımlarına görə, Çində oyun sənayesində sərvət qazanan milyarder Xu Bo, ABŞ-da surroqat analıq agentlikləri vasitəsilə 100-dən çox uşaq atasıdır.

İddia olunur ki, 48 yaşlı iş adamı bu uşaqların bir gün milyarder İlon Maskın uşaqları ilə evlənməsini istəyir və bununla da “qlobal ailə sülaləsi” qurmağı hədəfləyir.

Onlayn oyun şirkəti “Duoyi”-nin qurucusu Xu Bo sosial mediada özünü “Çinin ilk atası” kimi təsvir edir.

Bildirilir ki, o, paylaşımlarında ən azı “50 yüksək keyfiyyətli kişi uşağı” hədəfindən bəhs edib. Şirkətinin hesablarında Xu Bonun ABŞ-da 100-dən çox uşağının dünyaya gəldiyi qeyd olunur.

Xunun keçmiş sevgilisi Tanq Cinqin açıqlamaları məsələni tamamilə yeni bir səviyyəyə qaldırıb. Sosial mediada açıqlama verən Cinq, Xunun 300-dən çox uşağı ola biləcəyini, onlardan 11-nin illərdir özü böyütdüyünü iddia edib. Cinq yazıb ki, bu rəqəm şişirtmə deyil, hətta az ifadə edilə bilər.

“Wall Street Journal”a görə, Xunun “ailə sülaləsi” ideyası İlon Maskdan ilhamlanaraq hazırlanıb. Maskın da çoxlu uşağı olduğu bilinir, lakin o, əvvəllər şüurlu şəkildə nəslini genişləndirmək planı həyata keçirdiyi iddialarını təkzib edib.

V. QULİYEV