Çinin hərbi sahədə yeni müdafiə layihəsi olan “Nantianmen” proqramı çərçivəsində “Luaniao” adlı müasir və nəhəng aviadaşıyıcının inşası planlaşdırılır.

Reyting.az xəbər verir ki, bu barədə məlumatı Çinin CCTV telekanalı yayıb.

Məlumata görə, layihə ilk dəfə 2017-ci ildə Çinin “AVIC” dövlət müdafiə konserni tərəfindən təqdim edilib.

“Luaniao”nun uzunluğunun 242 metr, eninin isə 684 metr olacağı bildirilir. Yeni aviadaşıyıcının döyüş kütləsinin 120 min tona qədər çatacağı qeyd olunur. Bundan əlavə, platforma 88 ədəd “Syuan Nyu” adlı döyüş dronunu daşımaq üçün nəzərdə tutulub.

Yüksək hündürlükdən buraxılacaq dronların hipersəs raketləri ilə təchiz ediləcəyi və kosmosda əməliyyatlar apara biləcəyi ehtimal olunur.

Layihə Çin hərbi ekspertləri tərəfindən inqilabi yenilik kimi qiymətləndirilir və gələcək müharibə anlayışını dəyişə biləcək sistem hesab olunur.

Oqtay QORÇU