ABŞ prezidenti Donald Tramp İranın ali rəhbəri Əli Xamnəinin etirazlar zamanı baş verən kütləvi itkilərlə bağlı səsləndirdiyi ittihamlardan sonra İranda yeni lider axtarmağın vaxtının çatdığını bildirib.

Reyting.az xəbər verir ki, Trampın sözlərinə görə, İran hökuməti ölkəni idarə etmək üçün repressiya və zorakılığa əsaslanır.

ABŞ prezidenti qeyd edib ki, İranda yaranmış mövcud vəziyyətə və indiyədək görünməmiş səviyyədə zorakılıqlara görə ölkə rəhbərliyi, xüsusilə də Əli Xamnəi məsuliyyət daşıyır.

“Bu adam (Xamnəi-red.) xəstədir. O, ölkəsini düzgün idarə etməli və insanları öldürməyi dayandırmalıdır. Onun ölkəsi pis liderliyinə görə dünyada yaşamaq üçün ən pis yerlərdən birinə çevrilib”, - deyə Tramp əlavə edib.

Qeyd edək ki, Trampın bu açıqlaması Xamnəinin “X” (keçmiş Twitter) hesabında ABŞ prezidentini İranda baş verən ölümcül zorakılıq və iğtişaşlara görə məsuliyyətdə ittiham edən paylaşımlarından qısa müddət sonra səsləndirilib.

ELÇİN