ABŞ və Avropa Birliyi Türkiyəyə təzyiqləri artırır
Tarix: 18-09-2022 10:44 | Bölmə: Slayd
ABŞ və Avropa Birliyi Türkiyəyə təzyiqləri artırır

Türkiyənin, Ukrayna müharibəsinə görə Rusiyaya tətbiq edilən sanksiyalara qoşulmaması Qərbin narahatlıqlarına səbəb olub. Lakin Qərb hələlik rəsmi Ankaraya qarşı sərt mövqe tutmayıb, çünki Putin və Zelenskini görüşdürə biləcək yeganə ölkə Türkiyədir. Eyni zamanda taxıl müqaviləsi məhz Türkiyənin təşəbbüsü ilə imzalanıb.

Buna baxmayaraq, prezident Rəcəb Tayyib Ərdoğanın avqustun əvvəlində Rusiyaya səfəri zamanı Moskva ilə iqtisadi əməkdaşlığı artırmaq istəyini ifadə etməsindən, Rusiyanın “Mir” kart sisteminin Türkiyədə də istifadə olunacağı bildirildikdən sonra Qərb paytaxtlarında fəallıq artıb. Artıq Qərb ölkələri Ankaranın bu rəftarına qarşı səslərini ucaltmağa başlayıblar. Hətta ABŞ Maliyyə Nazirliyi avqustun sonunda TÜSİAD-a xəbərdarlıq məktubu da göndərib.

Reyting.az xəbər verir ki, İngiltərənin “Financial Times” nəşri ABŞ və Avropa Birliyinin (AB) Ankaraya təzyiqlərini artıracağını yazır.

“ABŞ və AB-nin Rusiya sanksiyaları ilə bağlı Türkiyəyə təzyiqini artırması” başlığı ilə dərc olunan və Qərb səlahiyyətlilərinə əsaslanan xəbərdə deyilir:

“Türkiyənin bank sektorunu qeyri-qanuni maliyyələşdirmə üçün potensial “arxa qapı” olması ilə bağlı narahatlıqlar yaranıb, ABŞ və AB Rusiyanın sanksiyalardan yayınması üçün Türkiyəyə təzyiqləri artırır”.



ABŞ Rusiyanın daxili ödəmə sistemi “Mir” ilə inteqrasiya olunmuş türk banklarına diqqət yetirərkən, Brüssel narahatlığını birbaşa Türkiyə rəsmilərinə çatdırmaq üçün bir heyət hazırlayıb. Sözügedən məlumatı “Financial Times”ə Qərb rəsmisi verib.

Türkiyəyə qarşı təzyiqlər Qərb paytaxtlarının yeni tədbirlər gördüyü, mövcud sanksiyaların daha sərt şəkildə icrasına yönəldiyi bir vaxta təsadüf edir. Bu dəyişiklik Rusiyanın Ukraynaya hücumundan sonra tətbiq edilən iqtisadi sanksiyaların Rusiya iqtisadiyyatına gözlənilən qədər zərər vermədiyinin etirafı deməkdir. Onlar düşünürlər ki, mövcud tədbirlərdəki boşluqları aradan qaldırmaqla Rusiyanı daha çox sıxa biləcəklər.

Qərb rəsmilərindən biri deyib: “Görəcəksiniz ki, biz maliyyə sektorunun kəsirlərinə diqqət yetiririk. Məsələn, biz, çox aydın mesaj göndərəcəyik ki, üçüncü ölkənin maliyyə institutları “Mir” ödəniş sistemi ilə əlaqə qurmamalıdır, çünki bu, sanksiyalardan yayınmaq riski daşıyır”.

Bu ay AB və ABŞ-ın sanksiyaların tətbiqi ilə bağlı danışıqlarda iştirak edən başqa bir Qərb rəsmisi əsas hədəf olaraq Türkiyəni göstərərək deyib ki, boşluqları aradan qaldırmalıyıq.

Qeyd edək ki, Türkiyə prezidenti Ərdoğan ölkəsinin Ukrayna münaqişəsinə “balanslı yanaşma”nı davam etdirəcəyini bildirir. Ərdoğanın Rusiyaya qarşı sanksiyaları imzalamaqdan imtina etməsi və son olaraq Moskva ilə iqtisadi əməkdaşlığı artıracağına söz verməsi Türkiyənin Qərb müttəfiqlərini təşvişə salıb. Ərdoğan ötən ay Türkiyədə “Mir” sisteminin genişləndirilməsində “ciddi irəliləyiş” əldə edildiyini bildirib.



Türkiyənin beş ən böyük bankı – “Vakıfbank”, “Ziraat Bank”, “İş Bankı”, “Denizbank” və “Halk Bank” Rusiya Mərkəzi Bankı tərəfindən “Visa” və “Mastercard”a alternativ olaraq hazırlanmış “Mir” ödəniş sisteminin üzvləridir.

Birləşmiş Ərəb Əmirliklərinə (BƏƏ) məxsus özəl bank - “Denizbank” və ABŞ-ın İrana qarşı sanksiyalarından yankeçmə planında rolu ilə məşhur olan dövlət bankı - “Halkbank” Rusiyanın Ukraynaya hücumundan sonra “Mir” sisteminə qoşulub.

“ABŞ-ın bütün sanksiyalara ciddi şəkildə riayət etməyi” tələb etdiyini bildirən “İş Bankı” bəyan edib ki, sanksiyaları yaxından izləyir və “Mir” kart əməliyyatlarının bu siyasətə uyğun həyata keçirilməsi üçün lazımi tədbirlər görür.

“Denizbank”ın şərhində isə “Biz sanksiyaya məruz qalan banklarla məşğul olmuruq. Biz Rusiyaya qarşı beynəlxalq sanksiyalara ciddi şəkildə əməl edirik”, - bəyanatını verib.

“Biz Türkiyənin sanksiyalardan yayınma kanalına çevrilməsinə imkan verməmək siyasətimizdə eyni dərəcədə sərtik”,- bunu Türkiyə XİN bəyan edib.

Tətbiqin gücləndirilməsi səylərinin bir hissəsi olaraq AB-nin maliyyə xidmətləri üzrə komissarı Mairead McGinness gələn ay Türkiyəyə gəlməyi planlaşdırır. “Komissar MakQinnes bu yaxınlarda maliyyə xidmətləri ilə bağlı məsələləri müzakirə etmək və xüsusilə Rusiyanın Ukraynaya təcavüzü qarşısında sanksiyaların tətbiqini müzakirə etmək üçün bir sıra ölkələrə səfər edəcək”,- Aİ-nin yüksək rütbəli rəsmisi deyib.

Onu da qeyd edək ki, Ukrayna mediası xəbər yayıb ki, bir sıra türk otelləri artıq Rusiyanın “Mir” ödəmə sisteminə məxsus olan kartlarla əməliyyat aparmaqdan imtina edib.




Bölməyə aid digər xəbərlər
21-09-2022, 15:10 Putinə təzyiqlər artır

{sape_links}{sape_article}