Rusiyanın Xarici Kəşfiyyat Xidməti Konstantinopol patriarxı Varfolomeyi dini birlik yaratmaq əvəzinə "pravoslav məkanında parçalanma fəaliyyəti"ndə ittiham edir.

Reyting.az xəbər verir ki, Xarici Kəşfiyyat Xidmətinin press-relizində Varfolomey "rahib paltarında anti-xrist" və "Baltikyanı ölkələrdən rus pravoslavlığını sıxışdırmaq ideyasına aludə olmuş şeytan" adlandırılıb.

Xarici Kəşfiyyat Xidmətinin iddiasına görə, ona bu işdə mAvropa ölkələrindəki rusofob əhval-ruhiyyəni "qidalandıranlar", Britaniya xüsusi xidmətləri, eləcə də "yerli millətçilər və neonasistlər" köməklik göstərir.

Bəyanatda qeyd olunur ki, Varfolomeyin bu cür "aqressiv iddiaları" Avropanın digər ölkələrinə də şamil edilir.

Kəşfiyyat Xidməti bildirir ki, Varfolomey Monteneqro Pravoslav Kilsəsinə avtokefaliya verməklə "xüsusilə itaətsiz" Serbiya Pravoslav Kilsəsinə zərbə vurmaq istəyib.

Rusiya Pravoslav Kilsəsi hələ 2018-ci ildə Ukrayna Pravoslav Kilsəsinə avtokefaliya verilməsi qərarından sonra Konstantinopol patriarxlığı ilə evxaristik əlaqələri kəsmişdi. Bunun əsas səbəblərindən biri isə məhz patriarx Varfolomeyin Rusiyanın Ukraynaya qarşı genişmiqyaslı işğalını şeytan ehtirası adlandırması, dəfələrlə pisləməsi olub.

Oqtay QORÇU