17:38 / 28-03-2024
Əməkdar artist vəfat edib
Hökumət Bakı Dövlət Universiteti ilə bağlı qərar verdi
Tarix: 19-04-2019 09:10 | Bölmə: Gündəm
Hökumət Bakı Dövlət Universiteti ilə bağlı qərar verdi

Bakı Dövlət Universitetində (BDU )orta ixtisas proqramları tədris olunacaq.

Reyting.az-ın məlumatına görə, bu, Nazirlər Kabinetinin qərarı ilə təsdiqlənən “Bakı Dövlət Universitetinin Nizamnaməsi”ndə əksini tapıb.

Nizamnaməyə əsasən, publik hüquqi şəxs statuslu BDU-nun fəaliyyət istiqamətlərinə bakalavriat təhsil səviyyəsində tam orta təhsil və orta ixtisas təhsili bazasında ayrı-ayrı ixtisasların təhsil proqramları üzrə genişprofilli ali təhsilli mütəxəssislərin hazırlanması, magistratura təhsili səviyyəsində ixtisaslaşmalar üzrə hər hansı ixtisas sahəsinin elmi-tədqiqat və ya peşəkar məqsədlər üçün daha dərindən öyrənilməsi, doktorantura təhsil səviyyəsində yüksəkixtisaslı elmi və elmi-pedaqoji kadrların hazırlanması, ixtisas və elmi dərəcələrin yüksəldilməsi, orta ixtisas və əlavə təhsil proqramlarının həyata keçirilməsi və elmin müxtəlif sahələri və istiqamətləri üzrə tədqiqatlar aparılması daxildir.

Fəaliyyət istiqamətinə uyğun olaraq BDU-nun orta ixtisas təhsili həyata keçirmək hüququ var. Universitetin vəzifələri sırasına isə iaşə xidmətini, tibbi və psixoloji xidməti təşkil etmək də daxildir.

Universitetə münasibətdə təsisçinin səlahiyyətlərini Təhsil Nazirliyi həyata keçirir. Universitetin ali idarəetmə orqanı Elmi Şuradır. Elmi Şuranın yaradılması, səlahiyyətləri və fəaliyyətinin təşkili qaydası Təhsil Nazirliyinin təsdiq etdiyi müvafiq əsasnamə və bu Nizamnamə ilə müəyyən olunur. Universitetin strateji inkişaf məsələləri üzrə idarəetmə orqanı ictimai əsaslarla fəaliyyət göstərən Himayəçilər Şurasıdır. Himayəçilər Şurasının tərkibini azı 3 nəfər olmaqla, Azərbaycan Respublikasının Təhsil Nazirliyi təsdiq edir. Himayəçilər Şurasının yaradılması, səlahiyyətləri və fəaliyyətinin təşkili qaydası Təhsil Nazirliyinin təsdiq etdiyi əsasnamə və bu Nizamnamə ilə müəyyən edilir. Universitetdə tədris-metodiki işlərin həyata keçirilməsi üçün Himayəçilər Şurası tərəfindən Elmi-metodiki Şura yaradılır. Elmi-metodiki Şuranın yaradılma qaydası və səlahiyyətləri Himayəçilər Şurasının təsdiq etdiyi əsasnamə ilə müəyyən olunur. Universitetin cari fəaliyyətinə rektor rəhbərlik edir.

Universitetin rektorunu Azərbaycan Respublikasının Prezidenti vəzifəyə təyin və vəzifədən azad edir. Rektor Universitetin mənafeləri üçün vəzifələrini yerinə yetirərkən, vicdanla, peşəkar qaydada və məntiqlə hərəkət etməyə, Universitetin maraqlarına sadiq olmağa, onun maraqlarını öz maraqlarından üstün tutmağa, ehtiyatlı olmağa, qərarların qəbulu zamanı ədalətli və qərəzsiz olmağa, habelə adına xələl gətirə biləcək hərəkətlərə və çıxışlara yol verməməyə borcludur. Rektor bu vəzifələrin Universitetin maraqlarına uyğun olaraq yerinə yetirilməsi üçün məsuliyyət daşıyır. O, öz vəzifələrini pozduğu halda, pozuntu nəticəsində Universitetə dəymiş zərərin əvəzini ödəməlidir.

Universitetin nizamnamə fondu 50 milyon manatdır. Universitetin fəaliyyətinə nəzarəti Təhsil Nazirliyi, həmçinin bu Nizamnamə ilə müəyyən edilmiş qaydada Universitetin idarəetmə orqanları həyata keçirirlər. Təhsil Nazirliyi Universitetdə plan üzrə və ya plandankənar yoxlamalar həyata keçirə bilər. Universitetin fəaliyyətinə dair illik hesabat Təhsil Nazirliyinə təqdim edilir.




Bölməyə aid digər xəbərlər
{sape_links}{sape_article}