İran ABŞ-nın mümkün quru əməliyyatına hazırlıq məqsədilə Xarq adasını qoşunlar, hava hücumundan müdafiə sistemləri və minalarla möhkəmləndirib.

Reyting.az xəbər verir ki, bu barədə CNN məlumat paylaşıb.

Qeyd olunur ki, İran son həftələrdə mümkün ABŞ əməliyyatına hazırlıq məqsədilə Xarq adasında tələlər qurur, əlavə hərbi personal və hava hücumundan müdafiə vasitələri köçürür.

Bildirilir ki, Tramp administrasiyası İran üçün vacib iqtisadi kanal olan və ölkənin neft ixracatının təxminən 90 faizinin keçdiyi bu kiçik adanı ələ keçirmək məqsədilə ABŞ qüvvələrindən istifadə etməyi düşünür.

Lakin, nəşr qeyd edir ki, ABŞ rəsmiləri və hərbi ekspertlər belə bir quru əməliyyatının Amerika qoşunları arasında əhəmiyyətli itkilər də daxil olmaqla, ciddi risklər daşıdığını deyirlər.

"Ada çoxqatlı müdafiə sistemlərinə malikdir. İranlılar son həftələrdə orada əlavə daşına bilən hava hücumundan müdafiə sistemləri yerləşdiriblər. Mənbələr bildirir ki, İran həmçinin adanın ətrafında, o cümlədən sahil xəttində piyada və tank əleyhinə minalar da daxil olmaqla tələlər qurur. Əgər prezident Donald Tramp quru hücumuna cəhd edərsə, ABŞ qüvvələrinin amfibiya əməliyyatına başlaya biləcəyi ərazilər də var. Prezidentin bəzi müttəfiqləri belə bir əməliyyatın zəruriliyi ilə bağlı ciddi suallar qaldırırlar, çünki adanın uğurla ələ keçirilməsi təkbaşına Hörmüz boğazı və İranın qlobal enerji bazarındakı inhisarı ilə bağlı problemləri həll etməyəcək", - deyə mənbə əlavə edib.

Xatırladaq ki, D. Tramp martın ortalarında ABŞ-nın Xarqdakı hərbi obyektlərə zərbələr endirdiyini, mina ehtiyatlarını və raket mövqelərini məhv etdiyini bildirmişdi.

İsrail mediası xəbər verir ki, Vaşinqton müttəfiqlərini Hörmüz boğazında gəmiçiliyi təmin etmək üçün "son çarə" olaraq quru əməliyyatının mümkünlüyü barədə məlumatlandırıb.

ELÇİN