Rusiya ordusu Ukrayna cəbhəsinin Slavyansk və Kramatorsk istiqamətində irəliləyişə nail olub.

Reyting.az-ın məlumatına görə, “DeepState” analitikləri bildiriblər ki, ruslar Donetsk və Xarkov bölgələrində də irəliləyib.

Rus ordusu digər ərazilərlə yanaşı, Vovçanskda da üstünlük qazanıb.

Xəritədəki qeydlərə görə, işğalçılar şəhərin şərqindəki Vovça çayı boyunca ərazini nəzarətə götürməyi bacarıb.

Bundan əlavə, ruslar Donetsk bölgəsində, Dronivka və Pazeno yaxınlığında da irəliləyiş əldə ediblər. Hər iki yaşayış məntəqəsi işğalçıların Slavyansk-Kramatorsk aqlomerasiyasına gedən yolunda yerləşir.

Daha əvvəl mediada Rusiyanın Mirnoqrad şəhərini demək olar ki, tamamilə nəzarətə götürdüyü bildirilirdi. “Ukrainska Pravda”nın məlumatına görə, ruslar artıq orada komandanlıq məntəqəsi, artilleriya və qərargah yerləşdiriblər.

“Sky News” xəbər verir ki, ruslar hazırda Donetsk bölgəsindəki Slovyansk və Kramatorsk şəhərlərini ələ keçirməyə çalışırlar. Nəşr qeyd edir ki, işğalçılar uğur qazanarsa, bu, Ukrayna üçün bütün şərq cəbhəsinin dağılmasına səbəb olacaq.

E. KAMAL