Bir müddət əvvəl maliyyə intizamsızlığı ilə gündəmə gələn Azərbaycan Dövlət Televiziyasının (AzTV) rəhbərliyini bu dəfə işçilərin əməyinin istismarında ittiham edirlər.

Reyting.az xəbər verir ki, AzTV sədri Rövşən Məmmədov başqa dövlət qurumlarında mətbuat və ictimaiyyətlə əlaqələr şöbəsinə rəhbərlik edən bir sıra əməkdaşlara AzTV-də qalmağın yeganə şərti kimi ictimai əsaslarla işləməyi təklif edib. Bu isə başqa qurumlarda mətbuat katibi olan teleaparıcıların - Namiq Əliyevin, Ceyhun Səfərin və Nərmin Xəlilovanın istefası ilə nəticələnib. Digər iki aparıcının pulsuz işləmək təklifini qəbul etdiyi bildirilir.

Qeyd edək ki, Azərbaycanın əmək qanunvericiliyində bir şəxsin iki iş yerində çalışmasına hər hansı qadağa yoxdur. Qanunvericilikdə işə götürənə daimi ştatlarla yanaşı həm də xidmət müqaviləsi çərçivəsində bu imkan yaradılır. AzTV-də isə maaşsız işləmək təklifi əməyin istismarı sayılmalıdır.

Məsələ ilə bağlı AzTV-nin İctimaiyyətlə Əlaqələr Şöbəsindən bildiriblər ki, AzTV-nin kadr siyasəti ilə bağlı məsələ QSC-nin daxili işi, daxili siyasətidir:

“Sorğunuza və təklifinizə görə təşəkkür edirik. Lakin onu da diqqətinizə çatdırmaq istəyirik ki, kadr siyasəti hər bir qurum kimi, QSC-nin də daxili işi, daxili siyasətidir və bu məsələ ilə bağlı hər hansı açıqlama verməyi də doğru hesab etmirik. Bizim əməkdaşlarımız görülən işlərdən narazı olduqda, birbaşa QSC-nin rəhbərinə müraciət edir və suallarına cavab tapır”.(gununsesi.info)