ABŞ prezidenti Donald Tramp Böyük Britaniyanı Çinlə işgüzar münasibətlərə qarşı xəbərdarlıq edərək, bunun “çox təhlükəli” olduğunu bildirib.

Reyting.az xəbər verir ki, Tramp bu açıqlamanı cümə axşamı Pekində Böyük Britaniya baş naziri Keyr Starmerlə Çin lideri Si Cinpin arasında keçirilən görüşdən sonra verib.

“Politico” nəşri yazır ki, görüşdə Starmer Britaniya vətəndaşları üçün Çində 30 günə qədər vizasız səyahət, eləcə də Çinin Şotlandiya viskisinə tariflərinin azaldılmasını təmin edib.

Vaşinqtonda “Melaniya” filminin premyerasında iştirak edərkən Trampdan Böyük Britaniyanın Pekinlə daha sıx əlaqələr qurmaq istəyi barədə soruşulub. ABŞ prezidenti sərt tənqidə üstünlük verib, eyni zamanda Böyük Britaniyanı Çinlə işgüzar münasibətlərə qarşı xəbərdar edib.

Çərşənbə axşamı Pekinə gedən təyyarədə Starmer səfərinin Trampı qıcıqlandırıb-qıcıqlandırmayacağı ilə bağlı sualları rədd edib:

“ABŞ ilə münasibətlərimiz müdafiə, təhlükəsizlik, kəşfiyyat, ticarət və bir çox digər sahələrdə ən yaxın münasibətlərimizdən biridir”.

Starmer ABŞ və Çin ilə ticarət arasında seçim etməyəcəyini vurğulayıb.

E. KAMAL