Milli Məclin növbədənkənar sessiyasının sonuncu iclasında deputat Zahid Orucla sədr Oqtay Əsədov arasında qalmaqal yaşanıb.

Reyting.az Modern.az-a istinadən xəbər verir ki, deputatlar birbaşa gündəlikdə duran məsələlərin müzakirəsinə keçib, Vergi Məcəlləsində dəyişikliklər edilməsi haqqında qanun layihəsini müzakirə ediblər.

Bu haqda Milli Məclisin İqtisadi siyasət, sənaye və sahibkarlıq komitəsinin sədri Ziyad Səmədzadə məlumat verib. O qeyd edib ki, təklif edilənlər vacib dəyişikliklərdir.

Deputat Qüdrət Həsənquliyev bu dəyişiklikləri müdafiə etdiyini açıqlayıb.

Zahid Oruc isə deyib ki, Böyük Britaniyada Avropa Birliyindən çıxmaq xətti qalib gəldi:

"Avropa Birliyinin gələcəyi sual altına düşür. Bu, iqtisadi bazarlara təsir edəcək. Artıq bu gundən funt strerlinqin qiyməti aşağı düşüb. Eləcə də avro dollar qarşısında zəifləməkdə davam edir. Odur ki, "tax-free” siyasətinə diqqətlə yanaşmaq lazımdır”.

Spiker Oqtay Əsədov isə deyib ki, "tax free” dünyanın 130 ölkəsində işləyir:

"Azərbaycan bura qoşulmaqla 131-ci ölkə olacaq. Bunun Avropa Birliyinə nə dəxli var axı?”.

Spiker Oqtay Əsədovun bu fikirləri Zahid Orucun etirazına səbəb olub. Deputat yerdən spikerə etiraz edərkən qarşıdurma yaranıb. Spiker Zahid Orucu sakit olmağa dəvət edib: "Siz danışdınız, mən də sizə qulaq asdım və izahat verirəm. Xahiş edirəm yerindən danışma”.

Zahid Orucun yerdən danışması spikeri yenidən əsəbləşdirib: "Otur yerində! Sakit ol. Səviyyəni gördük. Səviyyəsiz! Sənə söz verməyəcəm”.

Deputat Siyavuş Novruzov da tərəfləri sakitliyə dəvət edib. O, spikerin istənilən məsələ ilə bağlı fikrini demək hüququnda olduğunu bildirib.

İclasın yekununda Oqtay Əsədov Milli Məclisin İntizam komissiyasının sədri Ağacan Abıyevə müraciət edərək "Mən istəməzdim ki, sonuncu iclasımız belənotlarla başa çatsın. Ağacan müəllim, xahiş edirəm ki, Milli Məclisin deputatı Zahid Orucu etik davranış qaydalarını pozduğu üçün İntizam Komissiyasına dəvət edib, araşdırma aparasınız”,-deyib.
Spiker bildirib ki, kimsə bu cür qeyri-etik davranış nümayaş etdirsə, mütləq intizam qaydasınsa cəzalandırılmalıdır.

Reyting.az