Avropa İttifaqı Qarabağdakı yenidənqurmada aktivlik göstərmək istəyir
Tarix: 20-07-2021 13:00 | Bölmə: Gündəm
Avropa İttifaqı Qarabağdakı yenidənqurmada aktivlik göstərmək istəyir

"Azərbaycan 1991-ci ildə yenidən müstəqillik qazandıqdan sonra Avropa İttifaqı ilə əlaqələri inkişaf etdirməyə başladı. 1996-cı ildən inkişaf xətti daha da irəlilədi".

Bunu Reyting.az-a siyasi ekspert Elman Vəliyev Avropa İttifaqı Şurasının Prezidenti Şarl Mişelin ölkəmizə səfərini şərh edərkən deyib.

Onun sözlərinə görə, Azərbaycan ilə Avropa arasında təkcə siyasi zəmində deyil, iqtisadi, mədəni, təhsil, incəsənət sahələrində də əməkdaşlıq strukturları möhkəmləndirilib, qarşılıqlı idxal, ixrac prosesləri sürətlənib:

"Avropadan avtomobil, nəqliyyat avadanlıqları, Azərbaycandan isə neft, qaz ixrac edilir. Avropa İttifaqı Azərbaycanın müxtəlif sahələrinə bir çox yardımlar edir.

18 iyulda Avropa İttifaqı Şurasının Prezidenti Şarl Mişel Azərbaycana səfəri çərçivəsində ölkəmizin inkişaf istiqamətləri ilə yaxından tanış oldu. Bu, həmçinin bir hesabat xarakteri daşıyırdı. Yəni Avropa İttifaqı bir çox dövlətə inkişaf üçün yardımlar edir. Bu yardımlardan hansı səviyyədə istifadə olunduğu görünməlidir”.

E. Vəliyev əlavə edib ki, Qarabağın işğaldan azad edilməsindən sonra Yaxın Şərq, Uzaq Şərq və Qərb dövlətləri bölgədə yenidənqurma işlərində yaxından iştirak etmək üçün səylər göstərirlər. Avropa İttifaqı da bu məsələlərdə aktivlik göstərmək istəyir. Münaqişə tərəfləri arasında sabitlik üçün vasitəçi olmağa çalışır.

Siyasi ekspert diqqətə çatdırıb ki, Azərbaycan təktərəfli siyasət yeritmir, həm Şərq, həm Qərblə də əlaqələrini normal saxlayır: "Ümumiyyətlə, Azərbaycan onunla əməkdaşlıq etmək istəyənlərə, əlaqələr qurmağa çalışanlara həmişə əlini uzadıb. Azərbaycanın öz qonşuları ilə münasibətləri nizamlamaq siyasəti Avropa üçün də keçərlidir. Ərazilərinə iddia olunmadıqca, maraqlarına zidd hərəkətlər olunmadıqca diplomatiyaya daim razılıq verib. Avropa İttifaqı Cənubi Qafqazda, hətta deyərdim ki, bir neçə dövlətlərdən daha çox Azərbaycana üstünlük verir, maraqlarında daha çox yer ayırır. Çünki Azərbaycanın strateji mövqeyi, təbi sərvətləri (nefti, qazı) buna şərait yaradır. Ancaq yaxşı məlumdur ki, Azərbaycan xeyli müddət SSRİ himayəsində olub, Avropaya inteqrasiyası məhdud idi, amma bu gün bu inteqrasiya genişlənir”.

E. Vəliyev sonda qeyd edib ki, 2004-cü ildə Azərbaycan Avropa Qonşuluq Siyasətinə, 2009-cu ildə isə onun Şərq istiqaməti üzrə çoxtərəfli əməkdaşlıq formatı olan Şərq Tərəfdaşlığı proqramına daxil edilib. Azərbaycan üçün əsas beynəlxalq aləmdə nüfuza malik olmasıdır ki, bunu da bacarır. İnteqrasiya proseslərimizi daha intensivləşdirməliyik.

Reyting.az




Bölməyə aid digər xəbərlər
bütün xəbərlər
{sape_links}{sape_article}