Məşhur rejissor böyük faciəni ekranlaşdıracaq
Tarix: 08-05-2025 20:17 | Bölmə: Mədəniyyət
Məşhur rejissor böyük faciəni ekranlaşdıracaq

Hollivudun məşhur kinorejissoru Ceyms Kemeron müəllifi olduğu "Terminator", "Uçurum", "Avatar" və digər elmi-fantastik ekran əsərlərindən demək olar ki, 30 il sonra ilk dəfə gələcək texnologiyalarla bağlı olmayan bir layihəni reallaşdıracaq.

Reyting.az
-ın məlumatına görə, Ceyms Kemeron deyib ki, 2027-ci ildə "Avatar" filminin beşinci bölümü üzərində işlərini tamamlayandan sonra yeni, həmçinin xüsusi effektlər olmadan, yalnız həqiqəti əks etdirən film çəkəcək. Kemeronun bu layihəsi Hiroşima və Naqasaki faciəsindən bəhs edəcək.

Ulduz rejissor Amerikanın törətdiyi bu dəhşətli cinayətlərin danılmaz olduğunu bildirib.

C. Kemeronun yeni filmi Xiroşima və Naqasaki faciəsi haqqında bir romanın süjeti əsasında ekranlaşdırılacaq.

Rejissor "Avatar"-ı bitirdikdən sonra iki nüvə fəlakətindən sağ çıxmağı bacarmış bir adamın real hekayəsini, onun həyat xatirələrini lentə alacaq.

Məşhur kinorejissor elmi fantastikanı əks etdirən və sevilən filmlərin müəllifi kimi kino dünyasındakı yaddaqalan işlərindən uzun illər ötəndən sonra yaradıcılığında istiqamətini dəyişməyə qərar verib. Məhz elə bu səbəbdən də, Kemeronun növbəti kino layihəsi 1945-ci il faciəsinin 80-ci ildönümünə təsadüf edən bir film olacaq.

Hollivudun məşhur rejissorunun lentə almağı planlaşdırdığı bu yeni ekran əsəri tanınmış yazıçı Çarlz Pelleqrinonun "Hiroşimanın xəyalları" adlı tarixi romanı əsasında ərsəyə gələcək. Bu tarixi romanın süjet xətti Xiroşimaya atılan atom bombasından sağ çıxandan sonra çox çətinliklə Naqasakiyə çatan və bunun ardınca da sığınmaq istədiyi bu şəhərdə ikinci nüvə zərbəsinə tuş gələn şəxsdən bəhs edir. Yaponiyalı Tsutomu Yamaquçi burada özünün faciəsini tapır və baş verənləri həyatın ardı kimi qəbul edib yaşayır. O, dəhşətli bir dövrün sonunun canlı şahidinə çevrilir.

Pelleqrino bu sənədli və bədii kitabında onlarla şahidlərin ifadələrindən, eləcə də, arxiv materiallarından, araşdırmalardan, eyni zamanda məhkəmə arxeologiyası ilə bağlı toplanmış çoxsaylı məlumatlardan istifadə edib.

Üstəlik, ən maraqlı detal ondan ibarətdir ki, Pelleqrinonun kitabını oxuyandan sonra rejissor Kemeron canlı şahid Yamaquçi ilə onun son günlərində şəxsən görüşüb. Hollivudun məşhur rejissoru söz verib ki, onun səsini və başına gələnləri gələcək nəsillərə çatdırmaq üçün bu filmi çəkəcək.

Oqtay QORÇU




Bölməyə aid digər xəbərlər