"ASAN Könüllüləri” Gənclər Təşkilatı İctimai Birliyinin üzvləri Nizami Kino Mərkəzində 20 Yanvar faciəsinin iyirimi altıncı ildönümü ilə əlaqədar nümayiş olunan rejissor Vahid Mustafayevin "Qanlı Yanvar” filmini izləyiblər.

Kino Mərkəzin mətbuat xidmətindən Azərtac-a bildirilib ki, filmin nümayişindən qabaq təşkilatın sədri Fərid Sadıxlı çıxışında bu mövzuda olan filmlərin gənc nəslə örnək olduğunu və onların vətənpərvərlik ruhunda yetişmələrində böyük rol oynadığını söyləyib.

"Qanlı Yanvar” filmi sovet ordusunun törətdiyi qırğını və o qanlı gecədə baş verənləri Azərbaycan ailəsi olan - Nərimanovların gözü ilə göstərir. İki qardaş - kommunist Nəcəf və inqilabçı Mehdi əks düşüncəyə sahibdirlər. Onlar inandıqları uğrunda ölüm-dirim mübarizəsinə başlayıblar. Dramın mərkəzində isə onların anası - Xədicə dayanıb.

Rollarda türkiyəli aktrisa Nəbahət Çehrə, Leyn Deyvis, Yuri Balıyev, Azər Aydəmir, Faiq Mirzəyev və başqa aktyorlar çəkiliblər.

Qeyd edək ki, Nizami Kino Mərkəzində "Qanlı Yanvar” filmi gün ərzində pulsuz nümayiş olunub.