Ötən il ölkə başçısının göstərişi ilə Səbail rayonu, ''Dostluq” parkı adlanan ərazidəki dəbdəbəli villaların sökülmə proses uzun müddət mətbuatda müzakirə olundu.

Xatırlayırsınızsa, Bakı meri Hacıbala Abutalıbovun təşəbbüsü ilə, musiqi sədaları altında park ərazisindəki onlarla villa uçuruldu. Söküntü aparılan ərazidə yaşıllıq salınacağı bildirildi.

Reyting.az xəbər verir ki, Musavat.com-un müxbiri aparılan yaşıllaşdırma işləri və söküntüdən sonrakı vəziyyəti öyrənmək üçün "Dostluq” parkına baş çəkib. Bu zaman bəlli olub ki, dəbdəbəli villaların sökülməsindən 1 ildən çox vaxt keçsə də, vəd edilən yaşıllıq salınmayıb, "Dostluq” parkı bərbad vəziyyətdədir:

"Söküntü işlərinin pərakəndə aparılması ətrafı xarabalığa çevirib. Söküntü qalıqları ərazidən təmizlənmədiyindən hər tərəf toz-torpaq içindədir. Fürsətdən istifadə edən sakinlər isə ərazini zibilliyə çevrib. Hündür hasarları buldozerlə vurub aşırıblar, qalıqlar ətrafa səpələnib. Külək əsdikdə isə həmin toz-torpaq ətrafda yaşayan sakinlərin həyətlərinə dolur.

Bakı merinin əkdiyi ağaclar isə susuzluqdan saralıb. Külli miqdarda vəsait hesabına başa gələn yaşıllıqlar indi baxımsızlıqdan quruyur.Bəzi villalar sökülsə də,"Dostluq” parkının girişində xeyli sayda dəbdəbəli villa hələ də qalmaqdadır.

Görünür, söküntü zamanı Hacıbala Abutalıbovun səsləndirdiyi canlı musiqinin sədası hələ həmin villa sahiblərinin qulağına çatmayıb. Yoxsa, "Dostluq” parkındakı villada sakit yaşamaq kimin həddinə...”

Musavat.com yazır ki, diqqətçəkən məqamlardan biri də magistral yolun kənarındakı villalardan birində açıq-aşkar tikinti işlərinin aparılmasıdır, villa sahibi Hacıbala Abutalıbovun sökdürdüyü hasarını yenidən bərpa edir:

"2-3 metr hündürlüyündə betondan hasar tikdirir. Uzaqdan olsa da, işləyən usta və fəhlələri görüntüləyə bildik.

Parkın ətrafında yaşayan sakinlərlə də həmsöhbət olduq. Adının çəkilməsini istəməyən şəxs söküntü zamanı parkın ərazisini zəbt edən bir neçə villanın saxlanıldığını bildirdi: "Bu ətrafda yaşayanlar hamısı milyonerlərdi. Kasıb adam burada yaşamır. Kimin adamı varsa onun villasını sökmədilər. Qalanlarını isə sökdülər. Vaxtı ilə buraları özləri camaata satdılar, hamı aldı. Sonra da gəlib sökdülər. Camaat pulunu verib, torpaq aldı. Diqqət etsəniz, xeyli villalar qalıb. Yuxarı tərəflərə getsəniz, milyonlara başa gələn villaları görə bilərsiniz ki, onlar həmin prosesdə sökülməkdən xilas oldular. Ona görə ki, hamısı vəzifəli adamlardı. Görünür, onlara Bakı merinin də gücü çatmadı. Onsuz da bu parkdan əsər-əlamət qalmayıb. Yaşıllıqları məhv eləyib, sotunu yüksək qiymətə varlılara satdılar”.