Bu gün Bakı Metropoliteninin bənövşəyi xətt üzrə ilk iki stansiyasının istifadəyə veriləcəyi gözlənilir.

Modern.az saytı xəbər verir ki, istifadəyə veriləcək "Avtovağzal” və "Memar Əcəmi-2” stansiyalarıdır.

Ölkə başçısı İlham Əliyevin açılış mərazisimində iştirakı gözlənilir.

Prezident İlham Əliyevin 2011-ci il 18 mart sərəncamı ilə təsdiq edilmiş perspektiv inkişaf sxemi və 2011-15-ci illərin Dövlət Proqramına uyğun olaraq, Bakı Metropoliteni 2030-cu ildə 5 xətt üzrə 76 stansiya və 5 elektrik deposundan ibarət olacaq. Dövlət Proqramı əsasında, hazırda 23 stansiyası və 1 elektrik deposu olan Bakı Metropoliteninin Bənövşəyi xəttinin inşası davam etdirilir. Tikintinin birinci beşillik planına görə, bu xəttin 5 stansiyası inşa olunacaq. 12 stansiyadan ibarət olacaq bu xətt Beynəlxalq Avtovağzal Kompleksindən başlamaqla Qaraçuxur qəsəbəsinə qədər uzanacaq.

Qeyd edək ki, "Avtovağzal” stansiyasının tikintisinə 2009-cu ildən başlanmışdı. "Memar Əcəmi-2” stansiyası 5 mərtəbədən ibarətdir, stansiyada müxtəlif səviyyəli keçidlərdən istifadə olunacaq.

Stansiyanın 3 giriş-çıxışı var. Burada ümumilikdə 4 lift, habelə yanğına qarşı avtomatik mühafizə sistemləri, rabitə sistemləri, elektrik avadanlıqları quraşdırılıb.

"Avtovağzal” stansiyasının isə 8 giriş-çıxışı nəzərdə tutulub. Burada 20 eskalator və 8 travelator, həmçinin fiziki qüsurlu insanlar üçün lift də quraşdırılıb. İki yeni stansiyanın açılışı ilə Bakı Metropolitenini stansiyalarının sayı 25-ə çatacaq.