Kreml əvvəllər Rusiya üçün çox əlverişli olan ABŞ sülh planının əsas məqamlarını rədd etdikdən sonra Ukrayna və Avropanın sülh planı təkliflərini rədd etmək üçün şərtlər qoyur.

Reyting.az xəbər verir ki, bu barədə Müharibə Araşdırmaları İnstitutunun (ISW) analitikləri bildiriblər.

Rusiya prezidentinin müşaviri Yuri Uşakov deyib ki, Rusiya öz mövqeyini “çox aydın şəkildə” ifadə edib, Ukrayna və Avropa sülh planına düzəliş etsə, “sərt etirazları” olacaq.

Onun sözlərinə görə, Rusiya Donbasda silahsızlaşdırılmış “bufer zona” ilə bağlı hər hansı müzakirələr də daxil olmaqla, müxtəlif “ərazi məsələləri” ilə bağlı müddəaları qəbul etməyəcək.

Eyni zamanda, Kremlin mətbuat katibi Dmitri Peskov Rusiyanın sülh müqaviləsi ilə bağlı Avropanın mövqeyinin yenidən nəzərdən keçirilməsində maraqlı olmadığını vurğulayıb.

ISW analitikləri xatırladıblar ki, 11 dekabrda Rusiya xarici işlər naziri Sergey Lavrov ABŞ sülh planının yeddi bəndini, o cümlədən təmas xəttinə əsaslanan ərazi mübadiləsi və Ukrayna üçün təhlükəsizlik zəmanətləri ilə bağlı ilkin planın müddəalarını rədd edib.

E. KAMAL