"Dağlıq Qarabağla bağlı danışıqlarda durğunluq yoxdur".

Reyting.az ANS PRESS-ə istinadən xəbər verir ki, bu sözləri Rusiya Xarici İşlər Nazirliyinin rəsmi nümayəndəsi Mariya Zaxarova deyib.

"Bizim üçün ən vacib olan odur ki, Bakıda və İrəvanda bu barədə nə danışırlar. Biz bu və ya o biri tərəfdən təşəbbüskar addımlar görürük. Bu addımlar KİV-də hazır qərarlar və təcavüzkar fəaliyyət kimi təqdim edilir. KİV-də dərhal danışıq prosesinin dayandırılması haqqında fərziyələr meydana çıxır”, - deyə Zaxarova bildirib.

M.Zaxarova həmsədrlərin iştirakı ilə Dağlıq Qarabağ münaqişəsi üzrə görüş planlaşdırıldığını da deyib və hələlik bu barədə danışmağın tez olduğunu qeyd edib:

"Mənə bəllidir ki, bu cür görüş hazırda planlaşdırılır. Hələlik dəqiq tarix və yer barədə qərar qəbul edilməyib. Əsas odur ki, görüşün nəticəsi necə ola bilər. Ona görə də hansısa tarixdən danışmaq hələ tezdir. Lakin bir daha qeyd edirəm ki, bu görüş üzərində olduqca aktiv iş aparılır. Söhbət yaxın həftələrdən gedir".

M.Zaxarova Dağlıq Qarabağın statusu ilə bağlı məsələyə də toxunaraq deyib ki, Dağlıq Qarabağın taleyinə siyasi-diplomatik vasitələrlə qərar veriləcək.

"Münaqişənin həlli ilə məşğul olan ATƏT-in Minsk Qrupunun həmsədr (ABŞ, Rusiya, Fransa) ölkələrinin prezidentləri bəyan ediblər ki, Dağlıq Qarabağın statusu xalqların öz müqəddaratını təyinetmə prinsipinə əsaslanaraq müəyyənləşdirilməlidir. Bu bəyanatlar 2009-2013-cü illərə aiddir”, - deyə XİN rəsmisi bildirib.

Zaxarova deyib ki, Rusiya bu hədəfin reallaşdırılması üçün bütün lazımlı köməyi göstərməyə hazırdır.